23. majā bīdreibys “Latgolys Studentu centrs” Daugovpiļs biroja jaunīši reikuoja pasuokumu “Kinu vokors Štabikā”. Kinu vokorā tyka ruodeita eiskinys “Pyrmī osni” pyrmuo sereja “Gambits 1917” i ūtrei sereja “Lauleibys”.

Eiskinys pamatā izmontuotys viesturiskuos nūtikšonys 20. godu symta suokuos, kas Latgolai radeja vareibu atsadaleit nu Vitebskys gubernis, kab apsavīnuotu ar Kūrzemi i Vydzemi. Itaids sprīdums tyka pījimts Rēzeknē 1917. goda Latgolys kongresā, kuruo kontekstā teik pīmynātys taidys viesturiskys personeibys kai Fraņcs Kemps i Fraņcs Trasuns.

Pyrmajā kinys serejā paruodeits Fraņča Kempa i Fraņča Trasuna dialogs Pīterpilī, kur 20. godu symta suokuos suocēs latgalīšu atmūda. Sovukuort ūtrajā serejā paruodeitys 1917. goda Latgolys kongresa pyrmuos dīnys nūtikšonys kinoteatrī “Diana” Rēzeknē.

Kinu vokora apmaklātuojim beja vareiba satikt kinys idejis autoru, grupys “Dabasu Durovys” solistu Arni Slobožaninu. Piec eiskinys nūsavieršonys, apmaklātuoji dalejuos īspaidūs i diskutēja par Latgolys viesturis nūtikšonu aktualitati i atspīgeļuošonu myusu dīnuos. Kinu vokora apmaklātuoji nūruoda, ka itaida veida eiskinys roda leluoku izpratni par viesturi, personeibom i nūtikšonom kai vuiceibu gruomotys. Ari kinys idejis autors Arņs Slobožanins izsoka cereibu, ka ituos kinys pedagogi izmontuos vuiceibu procesā.