Nu 14. da 30. juļa vairuokuos Latgolys bazneicuos nūtiks kruošni vargaņu muzykys svātki – festivals Latgolys vargaņu dīnys 2017, informej tuo organizatoris Larisa Carjkova i Guna Kise. Jau ostoitū godu tys vosorā prīcynoj daudzus vargaņu muzykys cīneituojus. Itūgod festivala ītvorūs byus vareiba baudeit septeņus augstvierteigus koncertus.

Itūgod festivalā pīsadaleis vairuoki izcili muokslinīki: Jurs Vizbulis, Baiba Renerte, Diāna Jaunzeme-Portnaja, Baiba Tilhēna, Ruta Birzule, Larisa Carjkova, Renāte Stivriņa, Guna Kise, Lolita Svilāne (Oša), Santa Stivriņa, Jacinta Stivriņa, Simona Radoviča, Jacinta Ciganoviča.  Latgolys vargaņu dīnu 2017 eipašī gosti byus temperamenteiguo varganiste Aija Ziņgīte i Leluos Muzykys bolvys laureats, sytaminstrumentalists Edgars Saksons. 

Festivala mierkis ir popularizēt vargaņu spēlis kulturu i latvīšu vargaņu muokslu, atbaļsteit vargaņu uzturiešonu i apkūpi, kai ari vēļreiz aplīcynuot tū, ka Latgola i Latveja var lepuotīs ar spūdru varganistu saimi. Latgolys vargaņu dīnys ir lobdareibys projekts, i īīšona vysūs tūs koncertūs ir par zīduojumim, kurī tiks nūvierzeiti Kuorsovys vargaņu restauracejai.

Pasasokūt video projekcejai, koncertūs varganistu spēli varēs vērtīs tyvplanā. Taipat, turpynojūt tradiceju, piec koncertu vysim interesentim byus vareiba vērtīs instrumentu demonstriejumus, aizdūt vaicuojumus varganistim i paraudzēt sovus spākus, īsajiutūt varganista lūmā.

Latgolys vargaņu dīnu 2017 nūtikšona:

14. juļs 20.00 – Atkluošonys koncerts – Monstra Te Esse Matrem – Aglyunys bazilikys Boltajā zalā, 19.00 – Svātais Mišs. Pīsadola: Baiba Betlere (varganis), Schola Cantorum Vox Iubilantis – vad. Laine Tabora.

15. juļs 18.00 – Vosorys pastoralis – Bolvu evaņgeliski luteriskajā bazneicā. Pīsadola: Diāna Jaunzeme – Portnaja (varganis) i Lolita Svilāne (Oša) (flauta).

16. juļs 18.00 – Sapynu tuolumā – Krystpiļs Vyssvātuos Treisvīneibys Rūmys katuoļu bazneicā. Pīsadola: Ruta Birzule, Simona Radoviča (varganis), Jurs Vizbulis (tenors).

21. juļs 17.00 – Eiropys elpa – Daugovpiļs Jaunovys Marijis Bezvaineiguos ījimšonys Rūmys katuoļu bazneicā. Pīsadola: Renāte Stivriņa (varganis), Jacinta i Santa Stivrinis (vejūle), Daiga Maskaļūne (flauta).

23. juļs 17.00 – Tūpūšū varganistu koncerts – Leivuona Svātuo Erceņgeļa Mikeļa Rūmys katuoļu bazneicā. Pīsadola: Latgolys muzykys školu i muzykys vydsškolu audziekni.

28. juļs 18.00 – Eipašūs gostu koncerts – Malnovys Rūžukrūņa Dīvmuotis Rūmys katuoļu bazneicā (Kuorsovā). Pīsadola: Aija Ziņgīte (varganis), Edgars Saksons (sytaminstrumenti).

30. juļs 17.00 – Nūslāguma koncerts – Rēzeknis Vyssvātuokuos Jezus Sirds Rūmys katuoļu katedralē. Pīsadola: Larisa Carjkova, Jacinta Ciganoviča, Guna Kise (varganis), Baiba Renerte (mecosoprans), Dainis Skutelis (tenors), Baiba Tilhena (saksofons).