Itūreiz raidejuma “Cytaidi latviskais” golvonī varūni ir Aivars Ušpelis i juo saime. Ar pūdnīceibu Ušpeļu dzymta nūsadorboj jau paaudžu paaudzem.

Pūdnīka Ušpeļa saimē i dorbā, i kasdīnā malnajai kruosai ir eipaša nūzeime – malnuo kruosa dominej drēbēs; Ušpeli sevi sauc par “malnajim wylkim”, taišni partū malnuos keramikys pūdūs, skryuzēs, bļūduos paroksta vītā ir vylka lāpys nūspīdums.

Kai pretstats malnajai keramikai ir kruosu prīca Vēsmys Ušpelis gleznuos. I gleznīceibā, i pūdnīceibā saime dorbojās kūpā. Aivars, Vēsma i jūs dāls Jumis saimnīkoj mežu īskautā lauku sātā – apmāram 5 kilometru attuolumā nu Maltys. Jūs pasauļa redzīņs, muokslinīciskuo darbeiba i dzeivisstils ir sovpateigs – jī ir drūsmeigi sova ceļa guojieji, kurī ar prīcu uzjam ari gostus – klašu ekskursejis i saimis, kuruos apceļoj Latveju i ari īmieginoj prasmis pūdnīka dorbā Ušpeļu saimisteibā.