Jauka, simpatiska, sirsneiga saime – tai par Gavarim soka tī, kurī zyna Džeinu i Juri. Kūpeigys vierteibys, kūpeigs dzeivis redziejums, ūtra podturiešona, bārni i mīlesteiba – tys jūs vīnoj, veidoj jūs tagadni i nuokūtni. 

Džeina ar Juri īsapazyna attaiseitūs durovu dīnā Latvejis Nacionaluos aizsardzeibys akademejā. Tei beja mīlesteiba nu pyrmuo ocu skatīņa, eistyn kai puosokā. Jura i Džeinys dzeivē puosokom patīsai ir nūzeimeiga lūma. Jī tuos sadūmoj, stuosta sovim bārnim, gatavej dekoracejis i lelis, izruoda ari leluokai publikai.

Džeina i Jurs ir dzeivuojuši i struoduojuši Reigā, baudejuši gostu struodnīku dzeivis plusus i minusus Lelbritanejā, bet nu jau pīcus godus saimnīkoj Jura dzeda sātā Upmolys pogostā, kū ir veiduojuši nu jauna. Dzeive saskaņā ar dobu ir vīns nu Gavaru saimis pamatpryncypu. Džeina ir multimuokslineica – roksta dzeju, dzīd, gleznoj i nuokūtnē planavoj nūsadorbuot ar tielnīceibu.

Jurs ļaun Džeinai “lidot”, nu pats uzajiems saimnīciskuos klopotys, taisa skaistys skalinis, gryb īsavuiceit myurēt cepļus. Obeji ir Preiļu Breivuos školys pedagogi.