Latgolys mozī cīmateni i tī dzeivojūšī ļauds ir gona interesanti, kab dokumentātu jūs dzeivis stuostus, jūs pošus portratātu i par jim stuosteitu puorejai Latvejai. Ari itymā godā fotografe Elīna Kursīte i pietneica Rūta Šmite dūdās iz Latgolys cīmatenim, kurūs piec oficialajim datim ir mozuok par 10 dzeivuotuojim. Juos gatavej turpynuojumu gruomotai “Latvijas pierobežas pēdējie mohikāņi”.

Nu itys nav jūs vīneigais kūpeigais projekts, Elīnu i Rūtu ari interesej Latgolys pūdnīki i pūdnīceibys tradicejis. Kūpā ar vairuokim zynuotnīkim juos eistynoj projektu “Latvijas Zelta pods”. Tuo rezultatā taps kina i rokstu kruojums.