Izstuodis laikā interesenti varēs īsapazeit ar pādejūs godu gruomotom i muzykys īrokstim latgalīšu volūdā, kai ari nūpierkt tūs sovā eipašumā – Latgolys Studentu centrs pīduovuos iz itū šaļti jaunuokū izdavumu obejuos latvīšu volūdys literarajuos tradicejuos: Annys Rancānis dzejis kruojumu „Pylni kārmani dabasu… Bezdelīgu pasts” (2012).

Kūpā latgalīšu volūdā nu 1730. goda izdūti apmāram 2000 dažaidu izdavumu, tymā skaitā, pyrmuo ābece – 1768. godā, pyrmuo vuordineica 1858. godā, pyrmais popularzynuotniskais izdavums – 1832. godā, pyrmais gruomotu bibliografiskais ruodeituojs – 1885. godā, pyrmuo gazeta – 1905. godā… Leidzeigi kai latvīšu literaruo volūda, ari latgalīšu literaruo volūda ir laika gaitā atsateistiejuse – iz pošu šaļti spākā ir Vaļsts volūdys centra 2007. godā apstiprynuotī pareizraksteibys nūsacejumi.

Eipaši itai izstuodei nu Rēzeknis tiks atvasta ari nalela ekspoziceja nu Latgalīšu rakstnīceibys muzeja, kas vēļ arviņ teik turāts par entuziastu privatim leidzeklim. Sabīdreibā vajadzeigs klīdēt informacejis tryukumu par latgalīšu volūdys vaicuojumim, tymā skaitā, Saeimys deputatu vydā, deļtuo latgalīšu navalstiskuos organizacejis ir sagataviejušys nalelu duovynuojumu Saeimys bibliotekai.

Izstuode sareikuota par gūdu viesturiskuo 1917. goda (26.-27. apreļs piec vacuo stila) Latgolys kongresa 96 godu pīmiņai, kai ari izdevieja Vladislava Luoča symtgadis i latgalīšu volūdys pietnīka Mikeļa Bukša symtgadis atzeimuošonai. Juoatguodynoj, ka 1917. goda viesturiskajā kongresā tyka pījims lāmums: „Mes, Latgolys latvīši, apsavīnuodami ar Kūrzemis un Vydzemis latvīšim, paturēsim sovu pašvaļdeibu, pylnu pošnūteikšonys tīseibu volūdys, ticeibys, bazneicys, školu un saimesteibys, kai ari zemis vaicuojumā…”

Itymā godā teik planavuoti vairuoki pasuocīni: jau 28. aprelī Rēzeknē nūtiks skotuvis runys konkurss „Vuolyudzāni” i vydsškolānu olimpiade „Latgalīšu volūda, literatura i kulturys viesture”, junī byus Kulturys ministrejis reikuots seminars par latgalīšu volūdys vaicuojumim, augustā 3. Pasauļs latgalīšu kongress, oktobrī nu jau pīktuo latgalistikys konference (pyrmū reizi Reigā).

Informaceju sagatavieja Jurs Viļums, karteņa nu Latvejis Universitatis arhiva