Ordeņu kapituls 27. martā nūlēme par seviškim nūpalnim Latvejis vaļsts lobā pīškeirt Treju Zvaigžņu ordeni. Augstū vaļsts apbolvuojumu sajims ari latgalīši.

Keramikim Juoņam Seikstam pīškeirs Treju Zvaigžņu ordeņa V škiru i īceļs par ordeņa kavalīri. J. Seiksts gondreiž 50 sovys dzeivis godus ir atdevs keramikai, juo talants ir atzeits na tikai Latvejā, bet ari storptautiski. Keramikis ir veiduojs kruškys, vāzis, bļūdys, svečturus, duorza keramiku i daudz kū cytu. Seiksta darbneica atsarūm Modūnī, bet meistara saknis ir Latgolā, jis ir dzims Ezernīkūs.

Ari ilggadejam triatlona treneram, Daugovpiļs piļsātys Bārnu i jaunīšu centra “Jaunība” triatlona pulceņa školuotuojam, Latvejis Triatlona federacejis vaļdis lūceklim i treneru padūmis vadeituojam Anatolijam Levšam pīškeirs Treju Zvaigžņu ordeņa V škiru i īceļs par ordeņa kavalīri. A. Levšu sports saistejs jau nu mozūtnis, i ar laiku sports kliva par apzynuotu profesionalu izvieli. Par BJC “Jaunība” treneri A. Levša struodoj jau nu 1996. goda, bet Latvejis triatlona federacejis vaļdē ir nu 2010. goda.

Taipoš Treju Zvaigžņu ordeņa V škiru pīškeirs i par ordeņa kavalīri īceļs tāvu Benediktu (Rinaldu Stankēviču), Viļānu Svātuo Aļberta Leluo Mariaņu klūstera prīkšnīku, Viļānu, Ostrones, Rikavys i Nagļu draudžu prāvestu.

Karteite: president.lv
Olūts: vestnesis.lv