Pīktdīņ, 27. aprelī, iz 15. dzimšonys dīnys koncertu Rēzeknē, Latgolys viestnīceibys GORS Mozajā zalā, aicynoj Latvejā labi zynomuo Rēzeknis folklorys draugu kūpa “Vīteri”. Koncertā tiks svieteita na tika kūpys dzimšonys dīna, bet ari jaunys latgalīšu dzīšmu i notu gruomotys saimei – “Zalta puče” – atkluošona.

Folklorys draugu kūpa “Vīteri” izaveiduojēs 2003. godā, saeimūt kūpā Rēzeknis piļsātys Kulturys noma radūšajim darbinīkim i aktivuokajim kolektivu dalinīkim, dzīžūt i muzicejūt kūpā ar sovim bārnim. Kab saglobuotu latgaliskuos dzīsmis, daņčus i Latgolys nūvoda tradicejis, roduos ideja dybynuot folklorys draugu kūpu, piečuok ari kapelu. Folklorys kūpys izveiduotuoja i vadeituoja Sandra Stare par kūpys rosšonūs soka: “Ideja radeit folklorys kūpu dzymuse gribiešonā īvuiceit bārnim dzīduot latgaliski. Munā bierneibā školā latgalīšu tautysdzīsmis vuiceja, tulkuotys latviski. Niu gon “Vīteru” bārni runoj tik pošcīnis pylnai latgaliski, ka patīsa prīca.”

Kūpys dalinīki na tikai dzīd, doncoj, īt rūtaļuos, bet aktivi muzicej, spielejūt dažaidus tradicionaluos muzykys instrumentus. Itūšaļt kūpys lelūs i mozūs dalinīku pulkā ir vaira nakai 50 bārnu i jaunīšu. Nu folklorys kūpys izaugušs ari cytys radūšuos apvīneibys, nu kurom zynomuokuo ir postfolklorys grupa “Rikši”.

Reizē ar jubileja koncertu, kurā sasatiks na tikai asūšī i bejušī kūpys dalinīki, tiks prezentāts jauns izdavums – dzīduošonys gruomota saimem “Zalta puče”. Gruomota, atbolsojūt ideju par latgalīšu tautysdzīšmu vuiceišonu bierneibā, paradzāta vacuokim i mozajim dzīduotuojim – tymā ir 21 tautysdzīsme.

Gruomotu “Zalta puče” papyldynoj na tikai kūši zeimiejumi, kurymūs notys ir pučis, bitis i cytys dobys paruodeibys, bet ari vysu dzīšmu audio materials, kuru īdzīduojušs taišni folklorys kūpys “Vīteri” dalinīki. Ituo izdavuma idejis autore ir klavesiniste Ieva Saliete, kura, īsadvasmojūt nu uorvaļstīs radzātuo, uzrunuoja Sandru Stari radeit notu gruomotu ari latgaliski dzīduot grybūšim bārnim. Gruomotys izdeviejs ir bīdreiba “PARTITŪRA”, zeimiejumu autore – muokslineica Ērika Māldere.

Folklorys kūpys “Vīteri” jubileja koncerts i gruomotys “Zalta puče” atkluošona nūtiks 27. aprelī 18.00 Latgolys viestnīceibā GORS. Pasuokumā pīsadaleis ari improvizacejis teatris “Ārprāts”, biletis pīejamys GORS i “Biļešu Paradīze” sistemuos, cena nu 8,00 leidz 10,00 eiro. GORS kulturys viestnīku programys dalinīkim 30% atlaide.

Publicitatis karteitis.