Apreļa beiguos izdūtys divys zynuotniskys publikacejis par 1917. goda 9. i 10. majā (piec v. st. 26. i 27. aprelī) nūtykušū Latgolys kongresu. Latvejis vaļsts viesturē zeimeigajam nūtykumam veļteits jaunuokais žurnala “Latvijas Arhīvi” numers, publicāts ari apjūmeigs olūtu kruojums.

1917. goda pavasarī Rēzeknē iz Latgolys puorstuovu sapulci sasalaseja progresivuokuo latgalīšu iņteligencis daļa. Jī lēma, ka viesturiski škiertajai latvīšu tautai juoapsavīnoj i tuoluok pošai juolem sovs liktiņs. Kongresa delegati pījēma rezoluceju, kura paredzēja – Vitebskys gubernis, Kūrzemis i Vydzemis guberņu latvīšim teritoriali juoapsavīnoj i juodaboj autonomeja Krīvejis vaļstī.

Jaunuokajā “Latvijas Arhīvi” numerī publicāts Daugovpiļs Universitatis pietnīku, viesturnīku Henriha Soma i Aleksandra Ivanova roksts “Latgales kongress arhīva dokumentos”. Tymā īvītuota kongresa rezoluceja ar detalizātim komentarim, kai ari cyti dokumenti nu Boltkrīvejis Nacionaluo viesturis arhiva. Vaira informacejis par izdavumu latvijasarhivi.lv, nūpierkt var Latvejis Vaļsts viesturis arhivā.

Apjūmeiguoks H. Soma i A. Ivanova pietejums par Latgolys kongresu pīejams olūtu kruojumā “1917. gada Latgales kongress avotos, apcerēs un pētījumos”. Pietejums bez moksys pīejams elektroniskā versejā latgalesdati.du.lv. Tymā publicāti arhiva dokumenti i fotodokumenti, apkūpuotys presis publikacejis par kongresu, publicātys Latgolys kongresa dalinīku i oculīcinīku atminis, apkūpuoti cytu pietnīku i publicistu dorbi, kongresam veļteiti literari saceriejumi, taipoš apkūpuoti vizualuos muokslys dorbi, kurūs atainuoti Latgolys kongresa nūtykumi, kai ari īkļauta uzziņu literatura par zeimeigū nūtykumu.