31.majā Radūšuos darbeibys nedelis “radi! 2018” ītvorūs Daugovpilī nūtiks dizaina dūmuošonys praktiskais seminars “Nu radūšuos kūpīnys iz radūšū kvartalu?”, kurā aicynuoti pīsadaleit na viņ Daugovpiļs pilsātys, bet ari Latgolys regiona jaunīši, uzjāmuoji, pošvaļdeibu i navalstiskuo sektora puorstuovji, kai ari vysi interesenti.

Seminara laikā byus īspieja kūpā ar dizaina jūmys ekspertim generēt i prezentēt idejis radūšuo potenciala atteisteibys vītys izveidei Daugovpilī. Taida vīta asūt vajadzeiga, kab veicynuotu radūšū storpnūzaru uzjāmuojdarbeibu i sovstarpejū komunikaceju. Seminara golvonais aizdavums ir īpazeistynuot dalinīkus ar dizaina dūmuošonys metodem, kas paleidzātu veiksmeigi eistynuot idejis i projektus, jamūt vārā regiona eipatneibys i vajadzeibys.

Seminaru vadeis pīredzejuši dizaina dūmuošonys eksperti – nūdybynuojuma “Creativity Lab” dybynuotuoja Signe Adamoviča i uzjāmuma “Design Elevator” vadeituojs Čārlzs Bušmanis. Signe kasdīnā struodoj ar studentu komandu monitoreišonu i darbneicu vadeišonu inovaceju projektūs, kai ari voda apvuiceibys dažaidom auditorejom. Čārlzs kai dizaina konsultants ir struoduojs Šveicē, Nīderlandē, i itūšaļt dorbojās ar start–up, publiskuo sektora i cytim uzjāmumim.

Daugovpiļs praktiskais seminars nūtiks 31.majā nu plkst. 9.30 leidz 17.30, Vīstura īlā 2, LIAA Daugovpiļs biznesa inkubatora telpuos. Primaruo nūrisis volūda – angļu. Īprīkšeja dasasaceišona ir obligata, tū īspiejams izdareit leidz 27.majam, aizpyldūt registracejis anketu.

Radūšuos darbeibys nedelis “radi!” mierkis ir rūsynuot izpratni i interesi par radūšūs i kulturys nūzaru atteisteibu i mijīdarbeibu, aktivi īsaistūt Latvejis īdzeivuotuojus dažaidūs radeišonys, dūmuošonys i dareišonys pasuokumūs. Itūgod “radi!” programys golvonī pasuokumi nūteik Latvejis regionu centrūs.