Jau reit, 29.junī, tiks gūdynuota Daugovpilī dzymušuo keramiķa Pītera Martinsona (1931–2013) pīmiņa i muokslinīciskais veikums. Itūgod bez moksys nu plkst. 11.00 leidz 17.00 vareis īsapazeit ar Pītera Martinsona kolekceju i arhivu, kas atsarūn muokslys centra kruotuvē, informej muokslys centra puorstuovi.

 Pītera Martinsona fotografeja nu DMRMC Pītera Martinsona arhiva

Pītera Martinsona kolekceja ir topuse, pasasokūt juo saimis i draugu zīduojumim. Itūšaļt Rotko centra kolekcejā ir 473 Pītera Martinsona radeiti keramikys dorbi, 44 tušys zeimejumi i vairuok nakai 2500 vīneibu nu juo privatuo arhiva. Perspektivā itei kolekceja varātu tikt pīduovuota apskatei tūpūšajā Pītera Martinsona sātā, kas atsarass bejušuo Daugovpiļs cītūkšņa puļvera nūlyktovys ākā.

Pīters Martinsons ir vīns nu pasaulī pazeistamuokajim Latvejis keramikim. 6.julī, II storptautiskuos Latvejis keramikys biennalis laikā  Marka Rotko muokslys centrā jau ūtru reizi tiks pasnāgta storptautiskuo keramikys konkursa bolva – “Martinsona bolva”. Itūgod beja sajimti 359 pīteikumi nu 29 pasauļa vaļstim.