Roksta autore: Sarmīte Gaidule

Pīktdiņ, 17. augustā, Viļānu Muzykys i muokslys školā nūtiks animacejis kinys pyrmizruode par tū, kai Vinnejs Pūks atbraucs gostūs iz Viļānim. Itei ir trešuo animacejis kina, kuru veidoj Viļānu Muzykys i muokslys školys audziekni kūpā ar paleigim.

Školānim kinu paleidziejuši veiduot Inta Brence, Dainis Poikāns, Maruta Latkovska, Jurs Ruļuks i Anita Volāne. Pyrmais mieginuojums itymā žanrā beja “Biteit munu, zaltspuorneit”, kam sekuoja animacejis kina “Vasals, Vinnej Pūk!”. Niu ir topuse jau trešuo animacejis kina “Vinnejs Pūks Viļānūs”. Tai muzyku komponiejuši i īrakstejuši poši, taipat ari tykuši golā ar montažu. Izstruodis gaitā beja četri dorba dalejuma bloki – muzyka, muoksla, sižets, skaņa, kai ari papyldus Anitys Volānis vadeibā nūtyka runys darbneica, kur bārni vuicejuos skotivis runu, lai varātu labi īrunuot tekstus.

“Pyrmajā daļā Ružovais Sivieneņš, luoceits Mikeleits i palāda Zole raksteja dzimšonys dīnys apsveikumu Vinnejam Pūkam, bet ūtrajā Vinnejs Pūks brauc gostūs,” stuosta Inta Brence, Viļānu Muzykys i muokslys školys direktore. “Mums cīši īsapatyka animacejis žanrs, tamā var apvīnuot na tikai muokslu i muzyku, bet ari režeju, partū turpynojam tū dareit.”

Jau īprīkš īpazeitī varūni sagaideis gostūs sovu Anglejis cīmeņu, kas ar gaisa balonu nūsalaiss Viļānu stadionā. Jūs golvonais atkluojums byus, ka latgalīšu volūda ir cīši leidzeiga angļu mēlei, partū saziņa nūtiks obuos volūduos. Vītejī izruodeis Viļānus i labi pavadeis laiku kūpā ar slovanū Vinneju Pūku.

Inta Brence atzeimoj, ka latgalīšu volūdā veiduota animacejis kina ir interesanta pošim bārnim, kuri pīsadalejuši tuos veiduošonā. “Kina ir par i ap Viļānim, myusu dzymtū pusi, myusu dzymtajā volūdā, kū ir svareigi popularizēt bārnu vydā,” soka I. Brence.

17. augusta vokorā Viļānu muižys parkā jau nu 19 stuņžu nūtiks muzykys vokors, kurā pīsadaleis dzīdūšī jaunīši nu Dekšuoru, kai ari Dekšuoru saksofonistu kvartets i Rolands Naglis. Piec koncerta byus animacejis kinys “Vinnejs Pūks Viļānūs” pyrmizruode.