Rokstu sagataveja: portals lakuga.lv

2018.goda 18.augustā myužeibā aizguojs Latgolys muokslinīks, latvīšu tautysdzīšmu ilustrators Jurs Gaigals.

J. Gaigals dzims 1931.goda 5.aprelī Rēzeknis apriņča Ružinys pogosta Kovalevsku sādžā. Vuicejīs Daugavīšu 1. pakuopis i Purvmolys pamatškolā, Rēzeknis piļsātys latvīšu vydškolā, beidzs Latvejis Vaļsts universitatis Mehanikys fakuļtati. Sūpluok konstruktora dorbam J. Gaigalam izadeva atrast laiku sova muokslinīka talanta pylnveiduošonai.

Jau vydškolys i studenta godūs Jurs zeimiejs karikaturys sīnys gazetom, bet vysaktivuok gleznuošonai pīsavērsa 2000.godā, kod aizguoja pensejā i atsagrīza dzymtajā Latgolā. Latgolys Kulturviesturis muzejā globojās Jura Gaigala gleznys i zeimiejumi, latvīšu tautys dzīšmu ilustracejis, fotografeju i dokumentu kolekceja.

Muokslinīka Jura Gaigala izvadeišona nūtiks 22. augustā 12.00 stuņdēs nu Rozentovys Rūmys katuoļu bazneicys.

Portala lakuga.lv kolektivs izsoka leidzjiuteibu Jura Gaigala saimei, draugim i juo talanta cīneituojim.
 

Publicitatis karteite, Latgolys Kulturviesturis muzejs.