Rokstu sagataveja: portals lakuga.lv

Svātdiņ, 7. oktobrī, pi seve gostūs aicynoj Lūznovys muiža, kab taišni pušdīnis laikā 12.00 atkluotu sovpateigu izstuožu kūpprojektu – Kulturys škiunī byus apsaverama medeibu trofeju i muokslineicys Gundegys Rancānis gleznu izstuode. Piec izstuodis atkluošonys īcarātys dažaidys ar medeibom saisteitys aktivitatis vysim interesentim.

Ideja par izstuodi roduos ituo goda suokā, kod Rēzeknis nūvoda medinīki-entuziasti, sasadorbojūt ar Lūznovys muižu, aicynuoja pīsadaleit kuodreizejuos muižys tradicejis – medeibu trofeju izstuodis – atjaunuošonā, savuocūt trofejis i pasūlūt rudini sataiseit tūs izstuodi. Sūlejums teik turāts i 7. oktobrī muižys Kulturys škiunī nūtiks pavasarī savuoktūs medeibu trofeju, kurūs pamatā ir dzeivinīku rogi, atkluošona. Vīnā izstuodē ar trofejom byus apsaveramys ari muokslineicys Gundegys Rancānis gleznys. Piec izstuodis atkluošonys nūtikšonys dalinīki aicynuoti pīsadalei dažaiduos ar medeibu temu saisteituos aktivitatēs – īsapazeit ar medeibu sunim i nūsaklauseit jūs saiminīku stuostūs par itim medeibu paleigim, paraudzeit medinīku i medinīku sīvu gataveitūs gordanumus nu medejumu i Rēzeknis galis kombinata medejumu produkceju, kai ari paraudzeit sovys saušonys prasmis, saunūt nu lūka i gaisa blisis.

Vīnā izstuodē ar Latgolys medinīku trofejom apsaveramuos Gundegys Rancānis eļlis kruosys tehnikā radeituos gleznys, kas topušys padejūs treis godu laikā. Muokslineicu, kurei dzeivoj i struodoj taišni Rēzeknis nūvodā, vēļ arviņ aizraun Latvejis ainova, klusuo doba, sīvītis figura, kai ari dažaidys gaismys i pakriešļa spēlis dīnys, agra reita ci vāla vokora nūskņuos. Gundega rauga giut kotram godalaikam aktualū tematiku – cytureiz tī ir pavasara iudini, cytu snīkgs, vosorys suleigais zaļums ci zīdi, ūgys, zivs, sieņs i vyss cyts, kas kasdīnā mums ir apleik, viestejūt dažaidus suostus – kai nūviļkti zuoboki, kopeja skryuzis i cyti. Latgolys muokslineicys Gundegys Rancānis gleznys rūtoj ari tikū izdūtū Annys Rancānis dzejūļu kruojumu “Prīca i klusiešona”, par kurū lakuga.lv viesteja ITE.

7. oktobrī Lūznovys muižys Kulturys škiunī izstuode tiks attaiseita 12.00, bet puorejuos aktivitatis muižys teritorejā suoksīs nu 12.30. Vysys nūtikšonys, izjemūt saušonu nu lūka, ir bez kaidys moksys. Poša muiža grybātuojim svātdīnē byus apsaverama jau nu 9.00 reitā.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.