Roksta autors: Ināra Groce, žurnals “A12”

Aizguojušuos nedelis golā nūsasslēdze dizaina ekspoziceja “Gada balva dizainā 2018”, kurei nūtyka Kīpsolys izstuožu zalē Reigā izstuodē “Design Isle 2018”. Nu Latgolys lītu i interjera dizaina dorbus eksponēja Rēzeknis Tehnologeju akademeja i profesionaluos izgleiteibys školys.

Dizaina dūmuošonys psihologiskū aspektu pīduovuoja Inta Ieva Borise, Rēzeknis Muokslys i dizaina vydsškolys absolvente dorbā “Aizvērt durvis”. Autore nu suoku gribēja radeit četru leļu grupu kai cylvāka tāla metaforisku puornasumu i dizaina prīškmatā, i kaiteņā, a roduos septeni leļu tāli. Porcelana lelem juobyun taidom, ar kurom varātu kaituotīs, i ari taidom, kurys labi īsadarātu telpā i vidē. Nu suoku autore gribēja lelis taiseit nu porcelana piļneibā, bet saprūtūt, ka tys padareitu kaiteņu puoruok cītu i nakusteigu, līdzūt breivu kaitu ar lelem, nūlēme apvīnuot porcelanu ar audaklu, rodūt lelis ar porcelana kuojom, rūkom, golvom i audakla kermini. “Mes aiztaisom durovys, kod dūdamīs iz školu, dorbu, bārnuduorzu. Aiztaisom durovys iz paguotnis traumejūšom nūtikšonom, aiztaisom juos, kab suoktu jaunu dzeivis pūsmu. Aiztaisom durovys iz bierneibu. Tik īrosta darbeiba, ka reizem naīraugom juos simboliskū nūzeimi,” pīzeist tūpūšuo muokslineica.

Lelveikalu plauktūs ir vysaidys kaitenis, a storp jom naizadūd atrast porcelana lelis; ar rūkom gataveitys kūka i audakla kaitenis reši izadūd atrast ari kaidā godatiergā. Pasaulī varams atrast cylvākus, kurim interesej porcelana lelis i jūs viesture. Kuri juos vēļ taisa, rodūt i palobojūt jau asūšuos tehnologejis. Vys ir bārni, kuri gryb kaituotīs ar lītom, kas taiseitys ar rūkom nu dabeigu materialu. RMDV ekspoziceja “Gada balva dizainā 2018” byus apsaverama ari Latgolys izstuožu zalēs.

Roksts sagataveits sadarbeibā ar portalu lakuga.lv ar Vaļsts regionaluos atteisteibys agenturys finansialu atbolstu nu Latvejis budžeta leidzekļu projektā “Robežlīnijas”.