Roksta autors: žurnals “A12”

“Es sasyucu sevī vysaidu muokslinīku dailradi. Tys ir naizbāgami. Skateituojim vajag apjaust vyspuorpījimtys autoritatis. Myusu dīnu muokslā ir lels pulks breineigu muokslinīku,” tai par sovim dorbim soka Krīvejis muokslineica Jelena Šumahere. Izstuodei ir lakonisks nūsaukums “Laime”. Muokslineica ir absolviejuse Smolenskys pedagogiskuo instituta Muokslys i grafikys programu 1993. godā, i itymā periodā muokslineica ir produktivi gleznuojuse, tū nūviertej ari muokslys kritiki. Dorbi ir izstuodeiti vysā Eiropā.

Dorbus raksturoj ekspresionisms, primitivisms i abstrakcionisms. Muokslineica pasaļaun iz sovu intuiceju i pīzeist, ka dorbi atspīgelej gribiešonys i izjiutys. Tī nav īspaidi par dobysskotim, bet gon par īškeju pīdzeivuojumu, fantazejom. Tys ir dialogs ar skateituoju ar gleznu starpnīceibu. Daudzys lītys navar izsaceit vuordūs, tok īsadzilinojūt attālūs, vyss palīk skaidrys. Bet laime – jei ir mums apleik.

Rēzeknis Muokslys i dizaina vydsškola reikoj izstuodi sadarbeibā ar Rēzeknis Kulturys i turisma centru. Izstuode apsaverama da 23. novembra, tikšonuos ar muokslineicu izstuodis nūslāgumā 15:00 stuņdēs.

Roksts sagataveits sadarbeibā ar portalu lakuga.lv ar Vaļsts regionaluos atteisteibys agenturys finansialu atbolstu nu Latvejis budžeta leidzekļu projektā “Robežlīnijas”.