Roksta autors: portals lakuga.lv

Latgalīšu kuozys ir vīns nu Latgolys zeimynu, vīni nu svareiguokūs gūdu cylvāka dzeivē. Seņuok kuozys svieteja vyspyrms jaunivis pusē, tod jauniča aba iz divu golu. Koč ari seņ vaira kuozys nasvietej piec seņejūs tradiceju, ļauds vys rauga koč kū nu tūs paturēt ar šudiņ. Portals lakuga.lv pīduovoj apkūpuojumu par latgalīšu vuordim, kas saisteiti ar kuozom i saimi.

Kuozys latgaliski sauc ari par vedeibom i laulobom. Pasuokuma golvonī “vaininīki” ir jauničs i jaunive. Jaunuo puora muotis ir veiramuote i sīvismuote aba svuočys, jaunuo puora tāvi – veiratāvs i sīvystāvs. Jauniča napracātūs rodu puišus i draugus sauc par bruolinīkim, sovukuort jaunivis napracātuos rodu mārgys i draudzinis sauc par māršom ci muosiņuškom.

Sīvys dzymdynuotuojim aba vacuokim jauničs ir znūts, īguotnis ci primaks, ka atguojs dzeivuot pi sīvys saimis. Veira dzymdynuotuojim jaunive ir vadakla, ļaudova.

Bruoļu sīvys sauc par ītalem, muosu veirus par svojakim, veira bruoļs byus dīvers, svaiņs, veira muosa byus svaine, muosys veiru sauc par svaini, švagri ci švageri, sovukuort bruoļa sīvu sauc par māršu, svaini ci bratovu.

Eistys latgalīšu kuozys nav īdūmojamys bez dažaidu omotu. Saimineica vysod baruoja kuozinīkus i kluoja četrus goldus. Muzykants guoduoja par ļustiešonu, vīns nu atbiļdeiguokūs omotu beja taipinīkam, jis atbiļdēja par alkoholu kuozuos, staiguoja ar krūzi i kotram īleja ols ci kuo cyta.

Kuozu vadeituojim ir vairuoki apzeimiejumi – vedieji, svuoti, vakareiņs ar vakareini, agruok itū pīnuokumu uzticēja jauniča krysttāvam i krystamuotei. Kuozuos varēja īsarast ari stuomači aba napraseitī gosti.

Par mozū saimi seņuok skaiteja kūpīnu, kurā beja dzymdynuotuoji i jūs bārni. Sovukuort lelajā saimē kūpā dzeivuoja treis četrys paaudzis. Vacaistāvs saukts ari par dzedu, vaciku, dādu, bet vacuomuote par – babu, baneņu, mozdāls saukts par unuku, mozmeita par – unučku, unuci. Tāva ci muotis muosys bārnam saīt cjocis, tāva ci muotis bruoli – dzedzis, bet dzedzis sīvu sauce par dzjādzinku. Muosu i bruoļu bārni saīt pleminīki – plemašs i plemineica, muosu bārnus vēļ sauc par muosānim, bet bruoļu bārnus par bruolinīkim.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.