Rokstu sagataveja: portals lakuga.lv

Aija Eriņa ituo gods 12. majā byutu sviniejuse sovu 34 godu jubileju, tok 2017. gods 19. julī nagaideiti aizguoja myužeibā. Tyvojūtīs dzīduotuojis dzimšonys dīnai, pīduovuojam pyrmatskaņuojumu vīnam nu dzīduotuojis agreimūs studejis īrokstu, kas 2007. godā radīs duetā ar Niku Matvejevu (1958–2014), informej Valdis Metlāns.

Dzīsme raksteita Nika Matvejeva studejā, bet sovu oficialū izīšonu tai ari napīdzeivuoja. Nu studejis sasaglobuojušūs audio īrokstu beja varams veikt skanis restauraceju, i dzīsme tyka papyldynuota ar jaunom sytamūs instrumentu partejom.

Dzīsmis īrokstā pīsadaleja Aija kai vokals, Niks – vokals, tausteni, programiešona,  Valdis Metlāns – sytamī instrumenti. Muzykys i teksta autors – Andris Eriņš, aranžejis autors – pats Niks, skanis piecapstruode – Kārlis Šteinmanis.

A. Eriņa plašuoku atpazeistameibu dabuojuse ar uzvaru Latvejis Televizejis reikuotajā šovā “Latvijas Talants 2008”, treis sezonys pīsadalejuse LNT šovā “Dziedošās ģimenes”, kai ari ar daudzom popularom dzīsmem izskaniejuse Latvejis radeju stacejuos. Dzīduotuoja i kai solomuokslineica, i kūpā ar dzīdūšū Eriņu saimi sovys muzykaluos karjerys laikā ir davuse vaira par 100 koncertim vysā Latvejā.

Aijis īroksti i muzykaluo dailrade ir apkūpuota div izdavumūs – albumā “Par martu, maiju un decembri”, kas izguoja 2017. godā i 2018. godā izdūtajā izlasē.

Cytus īrokstus var nūsaklauseit Aijis Erinis muzykys kanalā.

Atguodynuosim, ka Aijis dzimšonys dīnā, 12. majā, 15.00 stuņdēs Gaigalovys pogosta kulturys nomā teik reikuots dzīduotuojis pīminis konkurss jaunajim vokalistim, dzīšmu autorim i literatim “Nūdreb sirds…”