Rokstu sagataveja: portals lakuga.lv

2.–6. junī Daugovpilī izskanēs pīcu atškireigu augstys kvalitatis koncertu cyklys “Ieskandinām Daugavpili dievnamos”, pīcūs leluokajūs piļsātys dīvnomūs byus vareiba bez moksys dzierdēt goreigū i klasiskū muzyku, informej Vita Viļevko nu Daugovpiļs piļsātys dūmis Kulturys puorvaļdis.

Koncerta reikuotuoji pīzeist: “Organizejūt itū muzykalū projektu myusu mierkis ir nūdrūsynuot na viņ augstys kvalitatis kulturys programu daīmameibu tyvuok īdzeivuotuoju dzeivisvītai, bet ari uzsvērt goreiguos dzeivis i dīvnomu nūzeimi Latgolys kulturtelpā.”

2. junī 18.00 stuņdēs Daugovpiļs Svātuo Pītera kēdēs Rūmys katuoļu bazneicā (Reigys īlā 39) svātku dīvkolpuojums “Veltījums pilsētai”. Pīsadola Latvīšu kulturys centra veiru kors “Forte” (muokslinīcyskais vadeituojs Jevgeņijs Ustinskovs).

3. junī 17.00 stuņdēs Daugovpiļs Vyssvātuokuos Jaunovys Marijis bezvaineiguos ījimšonys Rūmys katuoļu bazneicā (A. Pumpura īlā 11a) goreiguos muzykys koncerts. Pīsadola Larisa Carjkova (varganis), Raimonds Ozols (vijūle), Ilona Bagele (mecosoprans).

4. junī 17.00 stuņdēs Daugovpiļs Jezus sirds Rūmys katuoļu bazneicā (Bolūžu īlā 3) koncertprograma “Mocarts, Haidns un Bokerīni”. Pīsadola Līpuojis Steigu kvartets: Līga Baltābola (vijūle), Ginta Alžāne (vijūle), Ingars Ģirnis (alts), Dina Puķīte (čells) i solists Reinis Lapa (flauta).

5. junī 18.00 stuņdēs Daugovpiļs Martina Lutera katedralē (18. novembra īlā 66) Reigys Lutera draudzis kora koncerts (dirigents Matīss Tučs).

6. junī 14.00 stuņdēs Daugovpiļs Borisa i Gleba pareizticeigūs katedralē (Tautys īlā 2) goreiguos muzykys koncerts. Pīsadola Latvejis Pareizticeiguos bazneicys veiru kors ”Logos” (kora muokslinīcyskais vadeituojs i golvonais dirigents – viersprīsters Ioans Šēnroks).

Koncertu cyklys ir ari kai īskanis pasuokums Daugovpiļs piļsātys svātkim “Daugavpils mana pils”, kas nūtiks 7.–9. junī. Itū koncertu cyklu reikoj Daugovpiļs piļsātys dūme i Daugovpiļs piļsātys dūmis Kulturys puorvaļde sadarbeibā ar īsaisteitajim dīvnomim. Atbolsta Latgolys planuošonys regions, Vaļsts Kulturkapitala fonds i AS “Latvijas valsts meži”. Pasuokumi var tikt fotografāti i filmāti.