Rokstu sagataveja: portals lakuga.lv

Jau oktobrī varātu byut nūsaverama Arņa Slobožaņina jaunuo dokumentaluo filma “Stolipina latgalīši”. Materialu filmai Arnis suoce laseit Sibirī jau pārnejā rudinī, junī jis nu jau ar filmys radūšū komandu otkon dūsīs iz Sibiri.

Izguojušā oktobrī div nedeļuos Arnis kūpā ar Armandu Kūceņu i Aleksandru Rogačovu izbrauce ekspedicejis maršrutu Rēzekne–Moskova–Irkutska–Oļhons–Irkutska–Krasnojarska–Ačinska–Bogotola–Tjuhteta–Dvinka–Ačinska–Novosibirska–Moskova–Rēzekne. Dvinkys dzeraunē Arņam beja pat koncerts. Junī iz Sibiri filmys komanda dūsīs trejatā: producents i pasuokuma vadeituojs A. Slobožaņins, video operators i montažys režisors Ivars Utināns, tehniskais direktors Juris Linužs.

Par latgalīšu izceļuošonu iz Sibiri stuosta Valentins Lukaševičs: “1891. godā Krīvejis imperators Aleksandrs III ar sovu ukazu aizsuoce grandiozu lītu – dzeļžaceļa nu Čeļabinskys leidz Vladivostokai byuvi. Itū magistrali nūsauce Transsibs, ari tān jei ir Ginesa rekordu gruomotā. Par dorbim labi moksuoja, desmitem tyukstūšu cylvāku nu vysu imperejis molu pīsadaleja zemis i slīžu dorbūs. Ari latgalīši. A tod pa itū pošu dzeļžaceļu latgalīši brauce iz Sibiri laimis maklātu.

Brauce na iz glupū i na kur acs ruoda, a iz tīni, kur deve zemi i jau apsavāruoji beja nūbraukuši. Tī vysu izstuosteja, i – beja tod juopījam izškireigs lāmums. Te na iz sābru pogostu puorsaceļt – cylvāki saprota, ka aizbrauc pavysam. Aizbrauciejus pavadeja ar leluokom osorom nakai puišus iz armeju!

Brauce vasalom dzymtom, radinīku grupom, sādžom voi pussādžom. Kod atbrauce iz Sibiri, jaunuos vītys nareši nūsauce tai, lai nak vītvuords atsauktu atmiņā tāvaini, lai koč tai saglobuot piecteceibu. Tai Sibirī pasaruodeja Kreslavka, Dvinka, a Rēzekne tān ir izškeiduse lelajā Tomskā.”