Rokstu sagataveja: portals lakuga.lv

22. junī 11.00 stuņdēs Ludzys piļskolna teritorejā (Bazneicys īlā 52) nūtiks storptautysks kulturviesturis festivals “Sābri”, kurymā tiks ruodeitys iedīņa gataveišonys meistarklasis i senejūs omotu prasmis,  informej Ludzys nūvoda Turisma informacejis centrs.

Festivalā varēs paraudzeit Latgolys, Leitovys, Boltkrīvejis kulinarū montuojumu, tīpat varēs nūpierkt sīrus, olu, kvasu i cytus muojražuotuoju lobumus, ari amatnīku dorbus. Byus senejuos ceinis i saceņseibys, tautys tārpu parade, varēs vuiceitīs Dobys školā i peit Juoņu vaiņukus, nūsajimt vēļ cytuos darbneicuos. Bārnus vyzynuos ar zyrgim i īsaisteis rūtaļuos, byus dzīduošona i doncuošona.

Koncertā uzastuos folklorys kūpa “Garataka”, tradiceju kūpa “Griezes”, Malnovys kapela, pyutieju orkestris, nu Boltkrīvejis – “Княжыч”, “Весялуха”, “Старое сяло”, nu Leitovys – “Valaukis”. Nūbeigumā – Saulgrīžu īgrīzšona.

Īeja bez moksys. Iz tikšonūs Ludzys piļskolnā!