Roksta autors: portals lakuga.lv

12. oktobrī 10.00 stuņdēs ar sv. misi Rēzeknis Jezus Sirds katedralē suoksīs Fraņča Trasuna 155. godadīnys atceris pasuokums, piec misis pīminis šaļteņa pi F. Trasuna kopavītys Mīra īlys kopūs. 14.00 stuņdēs svineigais pasuokums turpynuosīs F. Trasuna muzejā “Kolnasāta”, Sakstagolā.

Kaida byutu Latgola bez Fraņča Trasuna? Kaida byutu Latveja, ka jamā nabyutu dzims tik drūsmeigs sova sirdsbolsa klauseituojs i, cāluma vadeits, nacionaluos apzinis mūdynuotuojs F. Trasuns? Pasateicam jam, atceramīs vīnuotuos, gaišuos dūmuos i, kas zyna, varbyut īsadvasmojamēs juo dorbūs, lai kūptu, atteisteitu i radeitu tuoļuok poši sev, sovai tautai i Latvejai.

Par pasuokuma daļu Sakstagolā stuosta muzeja “Kolnasāta” vadeituoja Ilona Akmentiņa: “Mes attaiseisim Trasuna dzejis brošuru. Juo kūpuotajūs rokstūs tei dzeja ir, bet, kai ir bejušys fabulys atseviškūs izdavumūs, tai niule dzeja.

Tod mums paradzāta Trasunu dzimtys kūka prezentaceja. Pyrms div godu pi mums muzejā Trasunu dzymtys saītā dzymtys kūka īstruodis prezentēja Trasunu dzymtys puorstuove, folkloriste Una Austruma, poša byudama reidzineica. Pamozom, pamozom jai tys kūks veiduojuos, apkūpuojūt arhivu materialus, bazneicu gruomotu izrokstus. Tūreiz tys beja papeira ruļs padsmit metru garumā. Gaidomajā pasuokumā jei jū prezentēs jau muzejam atbylstūšuokā formatā.

Tod byus Sakstagola teatra draugu kūpys uzvadums piec Trasuna stuosta “Divi brōli un divas Laimas” motivim. Tei ir pasaspieļuošona par dūmu, ka kotram dzeivē sovs ceļš īmams. Trasunam beja styngra puorlīceiba par tū, kū jis dora. Kotram juotrūn sovs eistais lauceņš, kur dorbuotīs, i veiksmeigi dorbuotīs. Kūpys vadeituoja Ināra Grietiņa ir uzvaduma režisore.

Muzykys pedagoge Solvita Ivanova sakomponejuse vīnam nu Trasuna popularuokūs dzejūļu “Tu navaicoj manis, kaids asu” muzyku. Nazkod jau tū dareja Ontons Matvejāns. Tū izpiļdeis Sakstagola J. Klīdzieja pamatškolys školāni Aijis Cīrulis vadeibā. Sakstagola pogosta folklorys kūpa “Kolnasāta” dzīduos O. Matvejāna dzīsmis.”

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.