Aleksandrs Ancāns
Divejaida mīla (Muotis dīnā)

Plaukst mīla vysskaistuokuo i cāluo,
Kod cylvākam cylvāks tūp draugs; –
Tei savīnoj sirdis i jiutys,
Tei puorplyust kai pīpiļdeits trauks. –

Kaut traukā vysduorguokais škidrums,
Tod tūmār tys kaidreiz tops sauss;
Kaut sirdī plaukst mīla, tod tūmār
Reiz tukšuots tiks osoru kauss.

Bet ir taida mīla, kas nadzīst,
Kū nasalauž tryukums i bods,
I cīsšonu puorbaudis gryutuos
Ir mīlys vysstypruokais gods.

Šei mīla ir dvēselis duorza
Vysskaistuokais laimeibys zīds, –
Tys izplaukst tik māmenis sirdī –
I bīži ar os’rom teik līts.

Augusts Egluojs
Muotei

Ar mīlesteibu pīmynu tevi,
Tu – vysulobuo, vysuduorguo, muot,
Dzeiveibu un spākus tu maņ devi,
Tu munus ceļus ceņtīs apgaismuot.
Jauns pavasars kluoj zemis leju,
Pyrmuos pučeitis jau zīdēt suok, –
Muot, pi tevis sovuos dūmuos eju,
Tuolū bierneibu šuos dūmys atsaukt muok.
Atmiņu tūs pavasarus sātā,
Cik tur syltuma, cik saulis beja daudz,
Tovys mīlesteibys gaismuojumā svātā
Debess duorzu zīdi izplauks.
– Tagad, māmeņ, vātrys pyuš maņ sejā,
Jau aiz kolnim dzeivis pavasars;
Tu vīna esi, kas vēļ lyudz par mani,
Tev vīnai muna dzeive duorga ir.

Ontons Slišāns
Sorkonu…

Sorkonu rūzis zīdu
Iz Tovu rūku nūlīku, muot…
Lai jei kai guņslīsme dag.
Lai navāg ar vuordim maņ saceit:
– Es Tevi meiļoju, muot! –
Sorkonu rūzis zīdu
Iz Tovu rūku nūlīku, muot…
Lai navāg osoru līt,
Pi Tovys siermuos golvys pīsaglaužūt:
– Es Tevi meiļoju, muot! –
Sorkonu rūzis zīdu
Iz Tovu rūku nūlīku, muot…
I zynu i saprūtu labi,
Ka Tovys suopis maņ naatnimt:
– Es Tevi meiļoju, muot! –
Sorkonu rūzis zīdu
Iz Tovu rūku nūlīku, muot…
Kab variejs, kab spiejs,
Es vysu, kas juoizcīš Tev,
Panimtu, meiļuo muot, sev…
Sorkonu rūzis zīdu
Iz Tovu rūku nūlīku, muot…
Lai runoj jis munā vītā
I munys osorys lej:
– Es Tevi meiļoju, muot! –
/1977/

Vilma Lele
Muotis dīnā

Preiļūs uobelis zīd.
Šudiņ — Mamenis dīnā —
Sirds kai jauna grib smīt.
Šudiņ bārni īs cīmā.

Šudiņ uobelis zīd.
Latvejā — Muotis dīna.
Kotram rūkā ir zīds,
Kotram mameņa mīla.

Preiļūs uobelis zīd.
Bolts skusteņš mameņai golvā.
Vysa piļsāta zīd,
Saulaina Mamenis dīna.
/12.05.2002/

Karteņa – foto Sanita Husare