Roksta autors: portals lakuga.lv

Pasauļa diktats latgalīšu rokstu volūdā raidejumā “Kolnasāta” itūgod skanēja trešū reizi, tū organizēja Latgalīšu kulturys ziņu portals lakuga.lv sadarbeibā ar Latvejis Radejis Latgolys studeju. Diktatam tyka izraudzeits fragments nu Egitys Kancānis stuostu gruomotys “Syltuo mola”. Pīraksteitū tekstu var puorbaudeit zamuok.

Diktata audio var nūsaklauseit raidejuma “Kolnasāta” profilā ite ci zamuok video. Teksts sastateits, īvārojūt Vaļsts volūdys centra 2007. godā apstyprynuotūs Latgalīšu raksteibys nūsacejumus, pīļaunama divskaņa “uo” apzeimuošona ari ar “ō”. Atsauksmis i īrūsynuojumus par diktatu lyudzam syuteit iz info@lakuga.lv.

Laižūt plūstu iudinī, tys bišku īgrymst, bet iz iudiņa turīs. Aņds brauks pyrmais! Īstumam jū leicī. Jau ruodīs, ka boltuo bura ir pavysam tyvai pi sagrybātūs vyzbuleišu, kod plūsts ūmai nūstuoj i vairs ni nu vītys. Aivars bļaun, lai Aņds jam paleigā airi. Aņds ruoda tukšys rūkys. Asam aizmiersuši jam īdūt tū leidza! I vyspuor airēt tukšom rūkom nav tik vīgli, kai ruodīs tim, kurī stuov krostā i tik bļaun.

“Palīc, kur esi! Mes tevi ratavuosim,” klīdz Aivars.

Jis izsādynoj mani iz leluos kamerys, īdūd rūkā divejus mītus, ar švunku īstum kameru nu krosta i pats izlāc iz juos nu ūtrys pusis. Kamera sasašyupoj, nūsmird piec gumejis, i kuojis dzolda pagaidom vēļ soltais pavasara iudiņs.

Lejupluodēt diktata tekstu: Word PDF

Diktatu finansiali atbolsta Latvejis Radeja i bīdreiba “Latgolys Studentu centrs” projekta “Mozuoklītuotuos volūdys, leluos īspiejis. Sadarbeiba pietnīceibā, kūpīnu īsaisteišona i inovativi vuiceišonuos reiki – COLING” (projekta leigums Nr. 778384) ītvorūs.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.