Rokstu sagataveja: portala lakuga.lv

Bīdreiba “Latgolys Producentu Grupa” turpynoj pārņ aizsuoktū latgalīšu literaturys populariziešonys akceju “Dūmoj ar komatim!”. Tymā ar video paleidzeibu latgalīšu kulturys aktivisti pīgrīž viereibu latgaliski radeitim literarim dorbim i tekstim.

Vys vēļ vystrausluokuo latgalīšu myusu dīnu kulturys daļa ir literatura, nūruoda projekta eistynuotuojs, muziks Guntis Rasims, pībylstūt, ka jaunu augstvierteigu dorbu ir samārā moz, taipoš literaturu latgaliski naskaita bīži. Kab veicynuotu latgalīšu literaturys popularitati, atpazeistameibu i skaiteišonu latgaliski, bīdreiba “Latgolys Producentu Grupa” sadarbeibā ar bīdreibu “Kukuži” eistynoj projektu-akceju “Dumoj ar komatim!”, rodūt literarūs dorbu video vizualizacejis.

Vīns nu idejis autoru, latgalīšu literats Oskars Orlovs (Raibīs) soka: “Ideja par “Dūmoj ar komatim” roduos vysā paseņ, verūtīs literarūs procesus uorzemēs, kur gruomotom teik taiseiti treileri, i cytys mini publicitatis akcejis. Tok tys pi myusu eipaši plaši nateik izmontuots. Itymā informativajā pasaulī eipaši literaturai vajadzeigs jauns, aizraunūšs, kūdūleigs veids, kai jū pasnīgt, varbyut īinteresēt skaiteituoju/klauseituoju. Literatura – tei ir mysudīnu cylvāka naatkareiba. Pošam pīsadolūt vysaiduos dzejis i prozys nūtikšonuos, asmu nūvāruojs, ka cytu reizi pošim autorim ir byklums i navareiba runuot sovus goradorbus i rakstnīkam na vysod tys ari ir juodora. Jam teksti juoroksta, na juodūmoj, kai jī juodanas auditorejai. Deļtuo ari itūreiz tekstus runoj cyti – latgaliskajā sabīdreibā zynomi ļauds.”

Vizualizacejom atlaseiti dažaidu laiku i dažaidu latgalīšu literatu dorbi – Ilzis Spergys, Pītera Jurciņa, Līgys Seikstys, Marijis Andžānis, Eināra Pelša, Oskara Seiksta, Marijis Dzeislys, Vilhelmīnis Urtānis i Valentina Lukaševiča dorbi.

Literarūs dorbus īrunuojuse Izgleiteibys i zynuotnis ministre, literaturzynuotneica Ilga Šuplinska, kino i teatra režisors Viesturs Kairišs, akters i komiks Juoņs Skuteļs, dzīsminīks Vinsents Kūkojs, Zīmeļlatgolys kulturys aktivists Andris Slišāns, Latvejis Radejis Latgolys studejis vadeituoja Renāte Lazdiņa, Ondrupinis kulturys aktivists Dainis Platacis, rakstnīks, publicists i multimuokslinīks Oskars Orlovs (Raibīs), grupys “Bez PVN” mūzikis, producents i sabīdryskais aktivists Guntis Rasims.
Vizualizacejis pakuopeniski da goda beigu tiks publicātys bīdreibys “Latgolys Producentu Grupa” profilūs socialajūs teiklūs Youtube i Facebook. Tuos radejuši Viola Lapa i Guntis Rasims.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.