Rokstu sagataveja: portals lakuga.lv

Aglyunys vydsškolā 2. aprelī 12.00 stuņdēs nūtiks rakstneicai Naaizmērstulei veļteituo Latgolys lauku školu jaunradis dorbu i ilustraceju konkursa nūslāguma pasuokums. Itūgod konkursa tema beja ”Jam ērgļa spōrnus un skrīn augši…”.

Naaizmērstulei veļteitais Latgolys lauku školu jaunradis dorbu i ilustraceju konkurss organizāts ar mierki veicynuot školānu dūmu i puordzeivuojumu atkluosmis jaunrdis dorbūs i ilustracejuos. Itū reizi kai konkursa tema izraudzeiti rakstneicys vuordi ”Jam ērgļa spōrnus un skrīn augši…”. Literarūs dorbus školāni varēja īsnēgt latvīšu literarajā voi latgalīšu volūdā. Nu 130 īsnāgtajim dorbim 22 bārni pīrakstejuši latgaliski, portalam lakuga.lv atkluoj školuotuoja Monika Pušņakova. Taipoš bārni konkursam varēja īsnēgt ilustracejis, kūpumā sajimti 139 dorbi.

Lobuokūs dorbu autori teik aicynuoti iz apbolvuošonu konkursa nūslāguma pasuokumā 2. aprelī, kai ari lobuokī dorbi, tūs fragmenti nūslāguma pasuokumā tiks nūskaiteiti i izlykti izstuodē. Konkursa dorbi ari tiks apkūpuoti jaunradis dorbu žurnalā. Konkursam dorbus īsnēgt aicynuoja 2. leidz 12. klasis audziekņus. Itūgod paīt 130 godi kai dzymuse Naaizmērstule aba eistajā vuordā Rozalija Tabine, kas zynoma ar sovu literarū i pedagogiskū darbeibu. Vaira par jūs var skaiteit rokstā “Rozalija Tabine – Naaizmērstule, Aglyunas Rūzeite, Kukažeņa i Tabiņa”.