Muola muokslys festivalā pīsadaleis ap 50 keramiķu nu 8 vaļstim – Latvejis, Lītovys, Igaunejis, Krīvejis, Ukrainys, Turcejis i Grīkejis. Koč ari festivalam ir plašs geografiskais mārūgs, saturiski dalinīki ir tautys daiļomota meistari, amatnīki i keramiki, kas sauc sevi par profesionalim muokslenīkim i puorstuov vysu dažaiduokuos keramikys sferys – nu viesturiskūs laikūs suoktom pūdnīceibys tradicejom da „laikmeteigai” keramikai, tys vys tik ir veļtejums Latgolys keramikai. Ar itū festivalu Daugovpiļs Muola muokslys centrs gryb na viņ īpazeistynuot ar Latgolys keramiku sovus uorzemu koleģus i draugus, nu ari īvīst tradiceju reikuot keramikai veļteitus pasuocīņus taišni Latgolā, kur muola muoksla ir ar seņom saknem.

Festivala programa:

18. majā 17:30 Daugovpiļs Mu
ola muokslys centrā (18. novembra īlā 8 ) tiks atkluota festivala izstuode, kurymā byus apsaverami I Starptautiskuo Muola muokslys festivala „Latgolys Muola Trauks” dalinīku keramikys izstruoduojumi. Izstuodis dorbūs byus radzama gon dažaideiba tradicejuos, kuruos dorbu autori jiemuši sev leidza nu tyvuokom i tuoļuokom vītom, gon vysus muokslenīkus vīnojūšais – materials i tuo pīduovuotuos īspiejis Dorbu vydā byus gon īrosti klasiskuos tradicionaluos tautys pūdnīceibys dorbi, gon izteikti dekorativi dorbi, kai ari konceptuali keramikys objekti.

19. majā nu 11:00 da 18:00 Daugovpiļs Skulpturu duorzā, kas atsarūn pi Sv. Pītera Rūmys katuoļu bazneicys Reigys i Mihoelsa īlu krystā, festivala apmaklātuojim byus vareiba nūpierkt festivala dalinīku dorbus keramikys izstruoduojumu tierdzeņā, kai ari viertīs i pīsadaleit keramikys meistarklasēs. Nu 16:00 da 18:00 nacionalūs bīdreibu koncerta pavadejumā tiks atkluota pyrmuo Latvejā Latgolys keramikai veļteituo skulptura. Skulpturys atkluošonā pīsadaleis ari Latgolys pūdnīceibys meistari. Vysys dīnys garumā byus vareibā viertīs keramikys apdadzynuošonys procesu molkys ceplī Daugovpiļs Muola muokslys centrā.

20. majā nu 11:00 da 15:00 Skulpturu duorzā turpynuosīs keramikys izstruoduojumu tierdzeņš. Suocūt ar 18:00 vysi interesenti teik aicynuoti pīsadaleit keramikys izjimšonā nu molkys cepļa Daugovpiļs Muola muokslys centrā.

Daugovpiļs Muola muokslys centrs nu jau vairuokus godus ir klivs par naatjamamu piļsātys kulturys sastuovdali. Centrs ir atjaunuotuos Daugovpiļs Nūvodpietnīceibys i muokslys muzeja keramiķu darbneicys, kurymuos dorbojās Tautys lītišķuos muokslus studeja „Latgale” i cyti keramiki. Vīnu nu nūzeimeiguokajom Muola muokslys centra misejom ir popularizēt, saglobuot i stiprynuot Latgolys keramikys tradicejis i muola muokslu.

Interesentim Muola muokslys centrs atvārts kotru nedeli nu trešdīnis leidz svātdīnei. Kotram grybātuojam ir īspieja apsaviert molkys cepli, lobīkuortuotu pogolmu, modernus izstuožu, konferenču zalus i vosorys izstuožu galereju, kai ari pīsadaleit meistardarbneicuos.

Sagatavieja Zane Bramane, Daugovpiļs Universitatis studente

Karteņuos – Daugovpiļs Muola muokslys centrs, foto Zane Bramane