Roksta autors: portals lakuga.lv

Daugovpiļs nūvoda pošvaļdeibys izplateitajā paziņuojumā par atcaltajim kulturys pasuokumim itamā vosorā nūruodeits, ka nanūtiks ari jaunuos latgalīšu muzykys festivals “Muzykys Skrytuļs”. Savukuort festivala organizatori portalam lakuga.lv apstyprynoj – par speiti vysom lykstom festivals nūtiks. Portals lakuga.lv skaidroj rodušūs situaceju.

Par festivala “Muzykys Skrytuļs” nūrisis datumim Daugoviļs nūvoda Leiksnā itūgod tyka izraudzeits 24.– 26. juļs. Tū organizej Leiksnys pogosta puorvaļde i festivala iniciatoru grupa. Festivala nūrisi finansiali beja pīkrytuse atbaļsteit Daugovpiļs nūvoda dūme.

15. aprelī nūtykušajā Daugovpiļs nūvoda dūmis uorkuortys sēdē tyka lamts par izmaiņom pasuokumu plānā, paradzūt atceļt vairuokus pasuokumus, kuru eistynuošona beja planavuota leidz augustam. Korekcejis pasuokuma planā īvīstys saisteibā ar COVID-19 izplateibu. Daugovpiļs nūvoda Kulturys puorvaļdis vadeituoja Ināra Mukāne skaidroj, ka, lai ari pagaidom uorkuortejuo situaceja pagarynuota da 12. maja, pastuov īspieja, ka īrūbežuojumi reikuot masu pasuokumus sasaglobuos vēļ ilguoku laiku. Turkluot asūšajā situacejā pasuokumus varātu byut daudz sarežgeituokt organizēt i pasuokumu izmoksys varātu pasalelynuot. Atcaltūs pasuokumu finansiejums nūvierzeits pošvaļdeibys budžeta programom “Pabalsts krīzes situācijā”, “Ēdināšanas atbalsts bērniem” i “Atbalsts bērniem attālinātam mācību procesam”.

Pošvaļdeibys izplateitajā paziņuojumā par atcaltajim pasuokumim nūruodeits, ka atcalts ari festivals “Muzykys Skrytuļs”, tok vīna nu pasuokuma organizatoru, festivala iniciatoru grupys puorstuove Sanita Pinupe portalam lakuga.lv nūruoda, ka teik maklāti rysynuojumi pasuokuma nūrisei cytūs formatūs, i organizatori festivalu pagaidom naatceļ.

“Mes turpynojam struoduot, sekuot leidza aktualajai informacejai, gaidom atbiļdis nu vairuoku potencialūs atbaļsteituoju i meklejam rusynuojumus, lai jaunuo latgalīšu muzyka varātu skanēt ari turpmuok par speiti dažaidim puorsteigumim, kū nas virusa pandemeja i leidz ar tū vaļsts nūsaceitī īrūbežuojumi, i Daugovpiļs nūvoda dūmis lāmums nafinansēt publiskūs pasuokumus, kas beja īplānuoti leidz ituo gods augusta beigu.

Mes meklejam dažaidus rysynuojumus festivala nūrisei, jau itūšaļt ideju ir daudz – sareikuot īprīšk nūsaceitajūs festivala datumūs digitalu latgalīšu muzykys maratonu ci varbyut puorceļt tū iz rudini. Prūtams, ka mes pīļaunam, ka kūpeiga tikšonuos kluotīnē byus juopuorceļ iz nuokušū godu,” soka S. Pinupe.

Cikom “Muzykys Skrtytuļa” organizatori aicynoj sovūs kalendarūs saglobuot 25. juli kai latgalīšu muzykys festivala laiku. Kur, kod i kaidā formatā festivals nūtiks, reikuotuoji sūla informēt majā. Cikom jaunumim var sekuot leidza festivala kontā Facebook.com.