Rokstu sagataveja: portals lakuga.lv

Īsastuojūt pavasareigam laikam, grupa “Borowa Mc” klauseituojim pīduovoj vosorys deju dzīsmi “Doncoj ar mani”.

Dzīsme ir radeita sadarbeibā ar producentu Arcadia 87 i īzeimoj pagrīzīni grupys “Borowa Mc” jaunuo skona mekliejumūs. “Stuosts ir par koč kū tik saprūtamu, tok itūšaļt aizlīgtu, kai tyvuošonūs vīns ūtram. Par puordūmom, sajiutom, tom naveiklajom i baileigajom šaļtim, kod nazini, kai byus. Tok cylvāki ļaunās! I tod dzymst jaunys emocejis, kaisle i taurini vādarā. Kotram stuosts var byut sovs, nu sajiutys leidzeigys,” par jaunū dzīsmi stuosta grupys “Borowa Mc” dalinīks Aigars Runčis.

Jaunuokuo dzīsme “Doncoj ar mani” dreiž byus daīmama Spotify i cytuos popularuokajuos straumiešonys vītnēs. Niu tū grupa pīduovoj nūsaklauseit i lejupīluodēt SoundCloud: soundcloud.com/user-391268938/borowa-mc-doncoj-ar-mani

Tai kai vosorys pasuokumu i festivalu nūtikšona vys vēļ nav skaidra, grupa aicynoj baļļuotīs attuolynuotai, izmontojūt ekranus i straumiešonys platformys. Kab varātu izakustēt i runuot tekstu leidza, “Borowa Mc” dzīsmei sagatavejuse video verseju.

Grupa “Borowa Mc” dybynuota 2004. godā. Leluokūs panuokumus giva ar dzīsmi “Vysskaistuokai meitiņai”, kūpā izdūti treis studejis albumi i vairuoki veiksmeigi singli. Grupa sajāmuse Zalta disku par debeja albumu “Trepis iz Nakurīni”. “Borowa Mc” dorbojās Aigars Runčis, Guntra Kuzmina i Ingars Gusāns.