Roksta autors: portals lakuga.lv

Maja izskaņā nūtiks Trešais pasauļa latgalīšu saliduojums virtualajā vidē. Itū reizi tymā eipaši aicynuoj pīsadaleit saimis ar bārnim.

Pasauļa latgalīšu saliduojums nūtiks 31. majā “Zoom” platformā 18.00 stuņdēs piec Latvejis laika. Iniciativys autoris ir Vuocejā dzeivojūšuo Aija Mežale i Īrejā dzeivojūšuo Ingrida Tārauda. Aijai ideja par uorzemēs dzeivojūšūs latgalīšu sasatikšonom škārsteiklā rodusēs jau pyrma vairuokim godim, tok eistynuot tū saguojs tikai niu.

“Latgolys nuokūtne ir bārni, ar kurim muotis i tāvi runoj latgaliski, vuica latgaliskuos tradicejis. Taidu ir gona, bet na daudz. Mes aicynojom iz Pasauļa latgalīšu saliduojumu bārnim, lai kūpā parunuotu par latgaliskuo montuojuma nūdūšonu sovam turpynuojumam, pamineitu meiklis, padzīduotu dzīsmis, parunuotu par kasdīnu – kai bārnim izadūd latgaliskais,” par gaidomū pasuokumu soka organizatoris.

Saimis, kurys grib aktivi pīsadaleit sasatikšonā, aicynoj leidz 31. majam dasasaceit, aizpyldūt anketu ITE. Vāruot i tīšsaistē komentēt varēs ari pasuokuma lopā Facebook.

Organizatoris uzsver – lai pīsadaleitu nav obligati juomuok runuot latgaliski pošam, tikai juosaprūt saceitais.