Roksta autors: portals lakuga.lv

Vosora ir kluotyn! I īrostai tys ir balleišu laiks, kod muzyka teik pagrīzta skaļuok mašynā ci kaidā atpyutys vītā. Portals lakuga.lv apkūpuojs interesantus faktus par latgalīšu muzikim i grupom.

Grupa, kas vysvaira uzvariejuse “Šlāgeraptaujā”

“Baltie lāči” aba “Boltī luoči” ir latgalīšu grupa, kas vysvaira uzvariejuse televizejis skateituoju bolsuojuma konkursā “Šlāgeraptauja”. Grupa uzvarēja treis godus piec kuortys – 2007. godā ar dzīsmi “Mātēm”, 2008. godā ar dzīsmi “Skaidruo volūda” i 2009. godā ar dzīsmi “Pār baikāla drūmajām stepēm”.

Vysklauseituokuo dzīsme

Par vīnu nu popularuokūs dzīšmu latgaliski nūteikti var saukt grupys “Latgalīšu Reps” dzīsmi “Žārei Gaļi”. Tai nu vysu latgalīšu dzīšmu vītnē YouTube ir vysvaira skatejumu. Dzīsme “Žārei Gaļi” tyka publicāta 2018. gods vosorā i pa itū laiku savuokuse jau puori 2 miļjonu klausejumu. “Žārei Gaļi” beja, i daudzim vēļ ir vosorys i galis “žāriešonys” hits.

Dzīšmu frāzis folklorizejās

“Latgalīšu Repa” dzīsmis “Žārei Gaļi” centraluo i suleiguo frāze  “žārej gali” nūzeimoj na tikai tū, ka ļauds sasavuokušs iz galis cepšonu. Ludzys pusī “žārej gali” nūzeimoj, ka vyss dzeivē īt iz augšu, veicās. Tok itei nav vīneiguo frāze, kuru par sovā ziņā legendaru padarejs Ivo Grigalis nu “Latgalīšu Repa”. Krivenchy aba Jāņa Krīvēna raidejumā “Pāļa bazars” “Latgalīšu Reps” atkluoja, kai Ivo pusaudža vacumā īraksteitū dzīsmi nūbeidze ar frāzi “čiuli pipši”, piec kuo itū teicīni vys vaira kasdīnys leksikā suoce lītuot jaunīši na tikai Latgolā, i niu var saceit, ka teicīņs “čiuli pipši” ir folkloriziejīs.

Vīnā “Boņuka” ceremonejā daboj vysvaira bolvu

Latgalīšu kulturys goda bolvys “Boņuks” padūšonys viesturē ir treis grupys, kurys nu bolvys padūšonys ceremonejis attīceigajā godā iz sātu aizbraukuši ar treis “Boņukim”. Grupys “Bez PVN” dzīsme “Screen” tyka apbolvuota ar “Boņuks 2008” kategorejuos lobuokuo dzīsme i lobuokais video, kai ari attīceigajā godā beja palykuse par radejis hitu. “Boņuks 2012” apbolvuošonys ceremonejā grupa “Dabasu durovys” divejus Boņukus sajēme par  dzīsmi “Pusnakts Triādis” i vīnu par albumu “Styklu vītā skaņa”. Sovukuort apvīneiba “Latgalīšu Reps” iz sātu ar treis muola statuetem brauce nu “Boņuks 2017” padūšonys ceremonejis.

Vysvaira “Boņukus” sajāmušuos grupys

Titulu par vysvaira sajimtajim Boņukim muzykys nominacejuos sovā storpā dola divys Latgolā i vysā Latvejā popularys i bīži klauseitys grupys – “Bez PVN” i “Dabasu Durovys”. Kotra nu grupu bolvys pastuoviešonys viesturē īgivuse pa ostonim “Boņukim”.

Vysmudruok īraksteitais albums

Projekts “Jezups i Muosys” ir spiejs īraksteit pylnvierteigu albumu vyseisuokajā laikā. Napylnu div stuņžu laikā tyka īraksteits albums “LAI SLAVA JAM!” ar deveņom dzīsmem. Gondreiž vysys dzīsmis tyka īraksteitys ar pyrmū raizi. Daži “Jezupu i Muosys” atpazeist ari peic dzīsmis “Sirds.Sirds.Sidrs”, kurā pīsadaleja ari underground muokslinīks i taidu dzīšmu kai “Prima” i “Balāde par Donatu” autors DJ Guntix aba Gunārs Indričāns i Jezups Martinovs nu seriala “Ugunsgrēks”, kuru atveiduoja Kristaps Rasims. “Jezups i muosys” par albumu sajēme ari Latgalīšu kulturys goda bolvu “Boņuks 2016” par snāgumu alternativajā muzykā.

Grupa, kurai svareigī nūsaukumi atīt lānai

Postfolklorys grupai “Rikši” vysi svareigī nūsaukumi atīt cīši lānom. Pīmāram, vuords “Rikši” grupai tyka dūts pavysam najauši jau tod, kod kūpā beja nūspālāts krītns pulks koncertu. Ari grupys jaunuo albuma  “trīp!” nūsaukums atguojs pādejā šaļtī. Lai gon par nūsaukumim teikūt dūmuots daudz i dikti, tī eistī i pareizī atīmūt pavysam najauši i nagaideiti, nūruoda grupys dalinīks Ēriks Zeps.