Roksta autors: portals lakuga.lv

Apvīneiba “Latgalīšu Reps” publiciejuse ūtru video nu gaidomuo albuma “Cyta dzela”. Dzīsmis “Vot tai” stuosts ir par īsaklauseišonu apkuortejūs i par byušonu pošam.

Martā “Latgalīšu Reps” publicēje pyrmū singlu “Shamani” nu gaidomuo albuma “Cyta dzela”. Par albumu apvīneiba soka: “Īmam sūli augšuok, lobuokā kvalitatē i izpiļdejumā.” Kai portalam lakuga.lv atkluoj vīns nu apvīneibys dalinīku Ivo Grigalis, nu jau albuma jau īraksteiti ir 95 procenti .

Jaunajā albumā īkļautuos dzīsmis apvīneiba beja planavuojuse prezentēt koncertā “Cyta dzela” 21. martā, kuru dasaguoje puorceļt. Kai jaunais datums beja nūlykts 13. juņs, tok, kai atzeist I. Grigalis, vysdreižuok, ka koncerts byus otkon juopuorceļ, kab varātu īvāruot vaļdeibys nūsaceitūs drūšeibys pasuokumus. Par galeigū lāmumu “Latgalīšu Reps” sovus fanus informēs piec 9. juņa, kod beigsīs vaļstī izsludynuotuo uorkuortejuo situaceja.

Grupys “Latgalīšu Reps” uzvarys guojīņs aizasuoce 2017. godā, tai bejuši vairuoki veiksmeigi hiti – “Skots pa lūgu”, “Es tycu”, “Atver durovys”, “Kūdra deg”, “Trešuo zvaigzne”, bet da šam popularuokajai dzīsmei “Žārej gali” nu pyrmuo solo albuma vītnē “YouTube” ir jau vaira kai 2 miļjoni skatejumu. Apvīneiba sajāmuse ari Latgalīšu kulturys goda bolvu “Boņuks” par veikumu 2017. i 2018. godā. Radejis “Pieci.lv” 2018. gods 7. septembra raidejumā grupa tyka TOP pyrmajā vītā ar dzīsmi “Žārej gali”. Muziki īgivuši atzineibu nu Vaļsts prezidenta Egila Levita i tyka uzaicynuoti uzastuot juo inauguracejis sareikuojumā.

“Latgalīšu Reps” 2019. gods vosorys sezonā ir uzastuojušs taidūs pasuokumūs kai “Summer Sound”, “Ghetto Games” festivalā Ventspilī, festivalā “OGLE”, Ozola jubileja koncertā Siguldā i c.