Rokstu sagataveja: portals lakuga.lv

11. julī iz koncertu Latgolys viestnīceibā GORS aicynoj muzykalais projekts “Muosys”. Tymā muzicej i radūši dorbojās treis muosys – Laima Maslova, Liene Brence i Marta Igaune. Mārgys klauseituojim pošā vosorys vydā pīduovoj koncertprogramu “Zynu, zynu tāva sātu”.

Leluoku atpazeistameibu “Muosys” īgivušys 2016. godā Igauņu saimis koncertā “Vysi zīdi pļaveņā” i 2017. godā koncertā “Atīdami Zīmyssvātki” Latgolys viestnīceibā GORS.

Mārgys ir publiciejušys ari sovu pyrmū dzīsmi ar taidu pošu nūsaukumu – “Zynu, zynu tāva sātu” ar latvīšu tautysdzīsmis vuordim. Muzykys autore dzīsmei ir Liene Brence.

Kai portalam lakuga.lv īprīkš stuosteja vīna nu dalineicu Marta Igaune: “Dzīsme “Zynu, zynu tāva sātu” tyka īraksteita pyrms kaida laika i beja taida sajiuta, ka juosagaida jaunuokuo muosa Laima atsagrīžam Latgolā, i tod tei dzīsme ari izskanēs i aizīs ar tū dziļū dūmu i viesti nu myusu.” Niu vysys treis muosys dzeivoj Latgolā.

Projekta “Muosys” koncertprogramys pamatu veidoj latgalīšu tautysdzīsmis, tūs apdaris i originaldorbi. Sovu byuteibu i redziejumu muzykā muosys atkluoj ar vysaidu muzykys instrumentu paleidzeibu. Mārgys spielej gon vejūli, gon mandolinu, flautu, gitaru, kūkli i vēļ cytus instrumentus.

 “Zynu, zynu tāva sātu” 11. juļī varēs dzierdēt Latgolys viestnīceibys GORS Mozajā zalā. Beleti grybātuojim jau ir daīmami GORS sātyslopā.