Roksta autors: portals lakuga.lv

Latgolys Kulturys centra izdevnīceibā izguojs 25. literaturys almanahs “Olūts”. Ituogods laidīņa laseituojim teik pīduovuoti 123 dzejūli, 16 tāluojumi/esejis, 9 stuosti, 3 lugys, 5 literaturai veļteiti roksti i 1 recenzeja.

Jaunajā “Olūta” laidīnī eipaši izceļami eisī Leonarda Rakicka mednīku stuosteni i “Bombino” pi tuo – eisa mežā pabyušonys sajiuta ar skaņom i krāslys patymsajim tūnim. Psihologiski puorlīcynūšs Ivetys Dimzulis stuosts “Vysas upes skrīn iz jyuru” – ari pusmyužā cylvāki pīdzeivoj mīlesteibu, vajadzeibu ārtai īkuortuotū dzeivi puorlauzt… Jaunus faktus varēs izzynuot ari lobi Latgolys kulturviesturis zynuotuoji, izlosūt rokstus “Latgalīšu periodika un grōmotas Raiņa un Aspazijas bibliotekā” i “Par pīmērstim dzejnīkim” – pīmāram, jums beja kas zynoms par latgaliski rokstūšū dzejnīku Juri Vimbaru, 1905. gods revolucejis daleibnīku?

Ituogods almanaha autori ir Ilze Keiša, Romons Spaitāns, Iveta Dimzule, Rūdolfs Linužs, Jūlijs Trōps, Voldemārs Voguls, Leonards Rakickis, Andris Pelšs, Magdalena Vjatere, Pīters Meikstums, Leonards Rakickis, Leontīne Apšiniece, Imants Zeltiņš, Evelīna Visocka, Helēna Kulincāne, Jōņs Vaivars, Jōņs Silkāns, Solvita Kleinarte, Jānis Greste, J. Vidiņš, Ādolfs Erss, Arvīds Aizsils.

 “Olūts” ir regulars latgalīšu izdavums, kura žanriskais saturs aptver prozu, dzeju, literaturkritiku, publicistiku i biografeju. Literaturys almanaha izdūšona suocēs vuocu okupacejis laikā – 1943. i 1944. godā V. Luoča izdevnīceibā izguoja pyrmī seši “Olūta” numeri. Septeitais numers izguoja jau trymdā – Rītumvuocejā – 1947. godā. Piec Latvejis naatkareibys atgiušonys, suocūt ar 1992. godu, “Olūtu” izdūd Latgolys Kulturys centra izdevnīceiba.