Roksta autore: Sandra Ūdre, portals lakuga.lv

Nasaverūt iz tū, ka vysom Latgolys piļsātu voi nūvodu pašvaļdeibom ir oficiali apstyprynuoti gierbūni, dažys ir papyldus izveiduojušys sev ari logotipus aba logo – ar saukli voi bez saukļa, ir logo varianti, kur ir tikai teksts bez kaida grafiska papyldynuojuma. Pošvaļdeibu logo teik lītuoti mozuok oficialā vidē kai gierbūni, nareši turisma informacejā jūs var īraudzeit sūpluok Latgolys turisma organizaceju logo. Daži vīdūkli par tū, kaids tod ir Latgolys viestejums itamā zeimu volūdā.

Pošvaļdeibys navīnaidā pozicejā

Juoatzeimoj – lai kaids pošvaļdeibu logo voi saukli byutu, piec administrativi teritorialos reformys dažom pošvaļdeibom tys vairs nabyus vajadzeigs – Rībeņu, Ruguoju, Zylupis nūvodi zaudēs niulenejū nūvoda statusu.

Vairums pošvaļdeibu sovu vizualū identitati plašuok voi skūpuok skaidroj, itei informaceja atrūnama pošvaļdeibu sātyslopuos – Daugovpiļs piļsāta, Daugovpiļs nūvods, Rībeņu nūvods, Rēzeknis piļsāta. Rēzeknis nūvodam detaļuos izstruoduota Rēzeknis nūvoda identitatis gruomota, jamā apraksteits ari vīneiguo Latgolys pogosta logo – Ūzulainis mikroshēmiskuo ūzulzeile, kas veidota saskaņā ar nūvoda simboliku. Kruoslovys logo ītvartais sauklis “Krāslavas novads, vieta, kur iepukstas Latvijas sirds” prosa paskaidruojumu, taidys informacejis navar atrast.

Atpazeistameiba mainūt?

Logotipa definiceja pastreipoj, ka golvonais ir atpazeistameiba. “Logotips – vīgli atpazeistamys zeimis, emblemys, burtu voi simbolu veidā attāluots organizacejis voi firmys nūsaukums, kū lītoj dokumentūs, īspīddorbūs, reklamys materialūs,” tai itys jiedzīns skaidruots vītnē tezaurs.lv.

Itūgod logo mainejuse Rēzeknis piļsāta i Latgolys regiona Turisma asociaceja “Ezerzeme”. Voi jaunais izreiz byus apazeistams? Īt pruotā kaids najauši dzierdātais komentars par Rēzeknis piļsātys logo maiņu: “Kū jī tī meklej, kaidu jaunu saturu īlikt. Vajag na tū, a lai Rēzekni atpazeitu. Raudzeitu tū Rēzeknis piļsdrupu arku izmontuot, kas jau tik daudzūs attālūs radzama i atpazeistama. Pat “Latgolas Bolsa” rubrikai “Ziņas nu dzimtines” izmontuots itys skots.”

Logotipu kūpīspaids

Kū par logotipim soka ar dizainu tyvuok saisteitī? Apsaverūt portala lakuga.lv apkūpuotū materialu, dizaina biroja “H2E” vadūšuo dizainere Ingūna Elere sacynoj, ka Latgola pošvaļdeibu i ar turismu saisteitu organizaceju logotipūs i saukļūs itūšaļt izaver daudzveideiga i navīnnūzeimeiga – ir vīta atteisteibai i viestejuma formuliešonai.

Toms Ratnieks, kas struodoj “Baltijas Biroju Servisā”, aktivi interesejās par dizaina lītom i Latgolys logotipus viertej tai: “Ka runa ir par logotipim kai taidim, tod leluokuo daļa ir galeigi garom, pat navar nūsaukt par logotipim. Vyslobuokī, atbylstūšuokī un reprezentabluokī logotipi ir Rībeņu nūvodam, Ūzulainis pogostam, Latgolys regiona Turisma asociacejai “Ezerzeme”. Interesants redzīs Dagdys nūvoda logo, bet, cik atbylstūšs i reprezentabls tys ir, tū gryuši pasaceit. Sovutīs puorejī ir dīzgon garum, nasaistūši, naatbylstūši, es pat saceitu, ka sataiseiti “paint” variantā iz dreizu rūku.”

Svareiguokais – īdzeivynuot

“3ClientAgency” puorstuovūšais Raimonds Platacis analizej dziļuok: “Latgola pošvaļdeibu logotipūs izaver kai vīna lela saime, kur kotrys dzeivē sytās pa sovam, kai muok. Taišni taipat kai tys nūteik Vydzemē, Kūrzemē voi Zemgalē.

Nav pareizu voi napareizu logotipu, skaistu voi neskaistu saukļu. Svareiguokais, lai identitatis atributi teik īdzeivynuoti. Ir juobyun kaidam, kas identitati vierzej nu viersa i iz leju vysūs leimiņūs, satur kūdulu i naatsakuop nu zeimyna lītuošonys vadlineju. Rupai runojūt, ka pošvaļdeibys logotipā ir zuts, tad zušam ir juobyun piļsātys pasuokumu afišuos, zuts sveicynoj pi ībraukšonys piļsātā i atsavoda nu juos izbraucūt. Kab identitatei nūtycātu turisti i pošvaļdeibu īdzeivuotuoji, tai suokūtneji ir juonūtic tim, kurim ir aizdavums ar jū struoduot.

Par turismu runojūt, ka viņ piļsāta nav zeimyns poša par sevi, kai tys ir ar Līpuoju, Ventspili voi Cēsim, juos identitatei ir cīš pakuortuota nūzeime. Izavielejūt golamierki, turists sovā golvā veic izvēli treis leimiņūs, nu kurūs kotram ir sova atseviška identitate.

1. Primari jis izavielej kulturviesturiskū nūvodu. Myusu gadejumā, Latgola jau poša par sevi ir zeimyns.

2. Tuoļuok jis dūmoj, kur kū var apsavērt, kū var pīdzeivuot. Itymā leiminī jis sasaskar ar pasuokumu, vītu, uzjāmumu identitatem.

3. Puorsvorā tikai trešajā leiminī jis teik saskarē ar pošvaļdeibys identitati, jau asūt iz vītys voi meklejūt nūtikšonys, vītys škārsteiklā.

Cylvāki tik vīgli nauzačer iz plykim sūlejumim, kas ir ītvarti pošvaļdeibu identitatēs. Ir tok pīradzāti saukli, kas daudzsūlūši klīdz, ka “Itei ir piļsāta, kur vyss nūteik”, bet tu atbrauc, un saprūti, ka ite nikas nanūteik voi nūteik, bet na eipašuok kai cytur. Nivīns muoksleigs logo voi sauklis nakomunicej spieceiguok par dzeivu cylvāku atsauksmem. Naseņ ar sovu auto izvoduoju taņtis pa sātom piec bieru mīlasta. Nu aizmugurejuos siedekļu ryndys dzierdieju cīš lobys atsauksmis par Ūzulainis pogostu. “Beidzūt par Ūzulaini runoj ari cytur” – tys ir lobuokais sauklis, kū dzierdēt nu pošvaļdeibys īdzeivuotuoju. Ka ir saiminīks, kas ceļ nūvodu voi pogostu, ka ir zeimyna vierzeituojs, cylvāks, kas īvīš identitati vysūs leimiņūs, ka ir īdzeivuotuoji, kas par tū īsastuoj i doluos, tikai tod var runuot par nūvoda, piļsātys voi pogosta identitatis efektivitati.”

Medeju atbolsta fonda īguļdejums nu Latvejis vaļsts budžeta leidzekļu. Par roksta saturu atbiļd portals lakuga.lv.