Rokstu sagataveja: portals lakuga.lv

Itūgod apritēja 26 godi kūpš tyka dybynuota Latgolys regiona Turisma asociaceja “Ezerzeme”, tyka aizsuokts dorbs pi transformacejis jaunā vizualā identitatē. Rezultatā jaunuo logo pamatelements ir Latgolys doba i juos radeituos sajiutu vizualizacejis, informej Latgolys turisma asociacejis puorstuove Laura Spundere.

Pasateicūt Eiropys Lauksaimnīceibys fonda atbolstam ir izstruoduota turisma marketinga koncepceja Latgolys regiona turisma politikys eistynuotuojim i pakolpuojumu snīdziejim, kū izstruoduojs Vydzemis augstškolys asociātais profesors Andris Klepers. Tys ir pyrmais itaida veida dokuments, kurā padzilinuoti teik analizāta situaceja Latgolā turisma jūmā i snāgts reiceibys plāns turisma pīduovuojuma pylnveiduošonai. Ar turisma marketinga koncepceju var īsapazeit ITE.

Kai nuokušais strategiskais sūļs beja, bolstūtīs iz īgiutajim datim nu koncepcejis, izstruoduot turisma komunikacejis strategeju, marketinga pasuokumu plānu, izveiduot Latgolys regiona turisma zeimynu i video Latgolys regiona atpazeistameibys veicynuošonai. Var drūsai apgolvuot, ka SIA “CIVITTA LATVIJA” komanda, struodojūt pi vizualuos identitatis i video veiduošonys, īpazyna i īmīlēja Latgolu. Caur vīnpadsmit asociacejis projekta partnerim – turisma uzjiemiejim, tyka radeits stuosts par vysaidū, modernū, bet vysod vīsmīleigū Latgolu.

Marketinga pasuokumu plāns paredz ari reklamys kampaņu Leitovā i Igaunejā, partū ka itūs vaļstu mierķauditorejis ir īvārojami lela daļa nu Latgolys uorvaļstu apmaklātoju. Koč ari itūšaļt situaceja nav nu lobvieleiguokūs uorvaļstu ceļuojumim, mes ticim, ka eistynuotī pasuokumi vainaguosīs ar ilgtermeņa interesi nu kaimiņvaļstu īdzeivuotuoju par Latgolys regiona i Latvejis apceļuošonu kūpumā.