Sasatikšona par Sibira latgalīšim i jūs volūdu
Roksta autors: portals lakuga.lv
16. aprelī 14.00 stuņdēs Kruoslovys nūvoda centralajā bibliotekā byus tīšsaistis sasatikšona “Sibīrijas latgalieši un viņu valoda” ar kulturviesturneicu, Latvejis Universitatis profesori Lideju Leikumu, viestej Kruoslovys nūvoda sātyslopa.
Pyrmais profesoris Lidejis Leikumys braucīņs iz Sibiri latgalīšu meklejumūs nūtyka 2004. goda julī, kas izavērte škatynojami myuža garumā. Par tuoļumā dzeivojūšajim latgalīšim profesore varātu runuot dīnom, itū pasuokumu jei komentej tai: “Tīšsaistis pasuokumā taisūs izstuosteit, kas tei taida Austrumu diaspora, kai mes jūs suocem meklēt. Svareigs impulss beja saisteits ar dzymtū pusi. Nabyutu tuos Sibira Kreslavkys, nazyn voi tei līta tai pīsaisteitu. Partū stuosteišu par Kreslavku i par dīnvydlatgalīšim vyspuor.
Ar sovom ekspedicejom Sibirī mes jau Kruoslovys ļauds asam īpazeistynuojuši, 2009. goda 1. martā sadarbeibā ar bīdreibu “Latgolys Studentu centrs” i Ondrupinis “Sovvaļnīkim”, kuri poši 2008. godā pabeja Sibirī iz Juoņa dīnys, tyka sareikuots plašs seminars kulturys nomā i izstuode muzejā.”
Daleibai tīšsaistis pasuokumā var dasasaceit da pīktdīnis 12.00 stuņdem, syutūt sovu e-posta adresi iz kraslbibl@apollo.lv, kab sajimt dasasliegšonys saiti. Pasuokuma tīšsaistei varēs sekuot ari Kruoslovys nūvoda centraluos bibliotekys “Facebook” profilā ITE.
