Rokstu sagataveja: portals lakuga.lv

“Latvijas Mediji” izdavuši gruomotu “Mēs visi esam gūstekņi. Stalag 346 karagūstekņa dienasgrāmata” viesturnīka Kaspara Stroda redakcejā, viestej informaceja izdevieja sātyslopā.

Ūtruo pasauļa karā Latvejis teritorejā ītyka tyukstūšom padūmu karagiustekņu, daudzim tei beja pādejuo dzeivis “pīturvīta”. Vīns nu jūs, Sorkonuos armejis 41. strieļnīku korpusa 177. strieļnīku divizejis 502. strieļnīku pulka karaveirs, farmaceits Aleksandrs Orehovs (Александр Орехов, 1917–?), 1941. gods 7. oktobrī palyka par Rēzeknē izveiduotuos karagiustekņu nūmetnis “Stalag 347” īslūdzeitū. A. Orehovs raksteja dīnysgruomotu, kur no 1941. gods 21. juņa da 1943. gods 8. maja atspīgeļuoja ceinis Austrumu frontē, tikšonu giustā i ceļu iz Rēzekni, kasdīnys dzeivi Rēzeknis karagiustekņu nūmetnē i dorbu kaidā vītejā zemnīku saimisteibā.

Itei dīnysgruomota ir unikala viesturiska līceiba, kas atkluoj kara bezjiedzeibu i pūstu vīnkuorša cylvāka – Sorkonuos armejis karaveira – acim. Originaltekstu atšifriejs i puorrakstejs Aleksandrs Bondarenko. Dīnysgruomotys tekstu nu krīvu volūdys tulkuojs Juris Ciganovs. Zynuotniskais konsultants Uldis Neiburgs, zynuotniskais redaktors i komentaru autors Kaspars Strods. Muokslinīki – Indulis Martinsons i Baiba Lūsīte-Teikmane. Gruomotys izdūšonu atbaļstejs Vaļsts kulturkapitala fonds.