Rokstu sagataveja: portals lakuga.lv

2021. goda izskaņā muziķu apvīneiba “Cegly” pīduovoj klauseituojim sovu trešū kasgadejū miksteipu i reizē ari videoklipu dzīsmei “Dziernavnīks”.

“Cegly” ir apvīneiba, kas roda muzyku jau vairuoku godu garumā. Apvīneibys repertuarā ir daudzi miksteipi (mixtape) aba aizlīnātys dzīsmis melodejis, kurom sacarāts “Cegly” teksts. Apvīneibā ir vairuoki dalinīki – Azarazarembo, Kūvuorņs aka Čūksts, Msungs, Lyl Malnīs, Drupona, Sleideigīs, Paļubomu, Ūdze, Arčers, Kaymoons, taipoš pi “Cegly” repertuara sovu rūku ir dalykuši ari Mygla i AlDiBi.

Niu ir izguojs kasgadejais “Cegly” miksteips, trešū godu piec kuortys – parostai miksteipi izīt goda nūgalē. Klauseituoju īvierteišonai publicēts ari videoklips dzīsmei “Dziernavnīks”. Tymā pīsadaleja gon “Cegly”, gon ari apvīneibys draugi i vysi īspiejamī paleigi. Klipu filmēja natuoli nu Rēzeknis, filmēt i montēt klipu paleidzēja “LA MURE MEDIA”. Audioīroksts, apstruode i mikss nūtyka “Bigmaar`s Records” īrokstu studejā Upītē.

“Klipu filmēja vairuokys dīnys, golvonais tuo viestejums ir par dziernavnīku, kurs ražoj myltus. Jam ir ari klāvs kai pīsags. Teik paziņuots, ka klāvā nūteik koč kaida darbeiba, par tū paziņoj policejai, kas atbrauc puorbaudeit, kas tī nūteik. Tai atsakluoj ari myltu cehs,” par video ideju stuosta “Cegly”.

“Īroksts tapa gona spontani. Beja ideja par myltim i dziernaunīku, tai tyka saraksteiti ari vuordi dzīsmei. Videoklips tyka radeits deļtam, ka vajadzēja nazkū svaigu latgalīšu kulturā, gribim paruodeit, ka var sataiseit na viņ lirisku dzīsmi par mīlesteibu, bet nazkū “underground” veidā. Cīši cerim, ka cylvākim patiks kas sovaiduoks, na tikai meilys ailis par sīvītem, mīlesteibu, bet ari par dzeivi,” pīzeist “Cegly”.

Nūsaklauseit jaunū “Cegly” miksteipu, kai arī dzierdēt vacuokys apvīneibys dzīsmis ir vareiba “Cegly” “YouTube” kanalā ITE.