Rokstu sagataveja: portals lakuga.lv

Aglyunys vydsškola izsludynuojuse Naaizmierstulei veļteitū Latgolys lauku školu jaunradis dorbu i ilustraceju konkursu “Tu vīnmār lobōks palikt sōc” (Tu vīnmār lobuoks palikt suoc), viestej publiski daīmamuo informaceja.

Konkursa mierkis ir školānu dūmu i puordzeivuojumu atkluosme jaunradis dorbūs i ilustracejuos, tuo aizdavumi – mudynuot školānus kasdīnā saredzēt skaistū, sovpateigū i sekmēt pīdereibys apsazynuošonu Latvejai; vāruot, analizēt, izviertēt i izsaceit puordūmys par tendencem sabīdreibā; rūsynuot školānus īpazeit Naaizmierstulis dorbus.

Konkurss nūteik jau sešpadsmytū reizi, kotru godu tam ir cyta tema, kas izrīt nu Naaizmierstulis dorbu. Itūgod tei ir: “Tu vīnmār lobōks palikt sōc”.

Konkursā var pīsadaleit Latgolys lauku školu 2.–12. klasis školāni. Jaunradis dorbu konkursa dalinīkim juopīroksta sevkura žanra dorbs atbylstūši temai, izavielejūt tam sovu viersrokstu. Dorba apjūms – leidz 2 A4 formata lopom datorrokstā. Raksteit var latgaliski voi latvīšu literarajā volūdā. Školuotuojs-konsultants dorbus īsyuta elektroniski leidz 9. februaram, kotra školāna dorbu pīvīnojūt kai atsevišku Word dokumentu, nūruodūt autora vuordu, pavuordi i klasi. Dorbi juosyuta iz e-postu monika.pusnakova@inbox.lv.

Sovpus ilustraceju konkursa dalinīkim iz A4 lopys juoizzeimej ilustraceja (tehnika piec izvielis) atbylstūši konkursa temai, lopys ūtrajā pusē juonūruoda autors, klase, škola i školuotuojs-konsultants. Ilustracejis originals juosyuta pa postu (posta zeimūgs 09.02.2023.) iz adresu: Daugovpiļs īla 6, Aglyuna, LV-5304 vai juoatdūd Aglyunys vydsškolys lītvedeibā.

Lobuokī dorbi, dorbu fragmenti konkursa nūslāgumā tiks nūlaseiti i izvītuoti izstuodē. Tūs apkūpuos ari jaunradis dorbu žurnalā. Taipat lobuokūs dorbu autori tiks aicynuoti iz apbolvuošonu konkursa nūslāgumā 9. martā 13.00 stuņdēs Aglyunys vydsškolā.

Naaizmierstule dzymuse 1890. gods 28. oktobrī Rēzeknis nūvoda Bieržgaļa pogosta Vackubulovā, struoduojuse par školuotuoju Jezufinovys Moļu muižys školā, piec tam ari školuos Bolvūs, Somersetā, Mežinīkūs, Aulejā i Aglyunā. Naaizmierstule beja pīticeiga i pošaizlīdzeiga, kolpuoja Dīvam i cylvākim. Apsazynojūt, ka bārnim tymā laikā datryuka satureigys losomvīlys, jei suoce vuokt teikys i puosokys, tulkuot cytu autoru dorbus. Naaizmierstule raksteja puosokys, dzeju, teikys, nūstuostus i stuostus kristeiguos moralis gorā. Sovūs dorbūs rakstneica izcēle patriotismu, dasadyure kasdīniškom lauku cylvāku dzeivis problemom, stuostūs i puosokuos parosti īlyka dzeivis gudreibys i pavuiceibys. Naaizmierstulis dorbi ir apkūpuoti kruojumūs “Lauku zīdi” (1934) i “Dīva dōrza pučeites” (1934). Pazeistamuokais nu Naaizmierstulis patriotiskūs dorbu ir rakstneicys pyrmais publicātais dzejūļs prozā “Tu manis navaicoj! (avīze “Dryva”, 1913. g. 21. numurs).