Rokstu sagataveja: portals lakuga.lv

Ituo gods sabīdryskūs medeju labdareibys maratons “Dod pieci!”, solidarizejūtīs ar ukraiņu tautu, aicynoj atbaļsteit Latvejā tykušūs ukraiņu bārnus. Nu 16. leidz 22. decembram tradicionali treis dīdžeji byus īslāgti stykla studejā, kab atskaņuotu zīduotuoju izvālātys dzīsmis, tok paraleli tam nūtiks ari cytys aktivitatis. Rēzeknē, Latgolys viestnīceibā GORS, 17. decembra vokorā nūtiks eipašs labdareibys koncerts, tymā pošā dīnā dīdžejs Tuoms Grēviņš Rēzeknē skrīn ari vīnu nu sovu septeņu maratonu.

Labdareibys maratona reikuotuoji aicynoj apmaineit vysmoz 5 eiro zīduojumu pret sovu meiluokū dzīsmi Pieci.lv eterā, kab atbaļsteitu Latvejā tykušūs ukraiņu bārnus. Sazīduotī leidzekli snēgs taišnu paleidzeibu bārnu pamatvajadzeibu nūdrūsynuošonai – školys pīdarumu i datoru īguodei, veseleibys izlobuošonai i psihologiskajam atbolstam, zīmys opovim, drēbem i cytom akutom lītom. Pyrmū reizi “Dod pieci!” viesturē stykla studejā īslēgs na viņ Latvejis Radejis 5 – Pieci.lv etera personeibys Martu Grigali i Lindu Samsonovu, bet ari gostu dīdžeju – ukraiņu muziki ar latvīšu saknem Edgaru Vilcānu. Sovpus DJ Tuoms Grēviņš turpynuos pārņ aizsuoktū tradiceju, “Dod pieci!” laikā skrīnūt septeņus 42 km maratonus, pīsaistūt papyldu zīduojumus ari regionūs. 17. decembrī Tuoms byus Rēzeknē, kab uzjāmuma „Latvijas Finieris” vuordā skrītu 42 km distanci. Jis startēs 10.00 stuņdēs nu Latgolys viestnīceibys GORS. Sovpus 18. decembrī jis skrīs maratonu Daugovpilī, pasasokūt “Circle K” atbolstam.

Tuos pošys dīnys vokorā, 17. decembrī, 21.10 stuņdēs Latgolys viestnīceibā GORS nūtiks eipašs labdareibys koncerts ukraiņu atbolstam. Koncertā uzastuos “Carnival Youth”, ansis, “Tautumeitas”, apvīneiba “Latgalīšu reps”, grupa “Citi Zēni”, kai ari “Shakima Trio”, kurā apsavīnuojuši ukraiņu muzike Shakima Garunts, Jānis Ruņģis i Ainars Majors. Labdareibys koncerts apmaklātuojim ir daīmams par zīduojumu vysmoz 5 eiro apmārā dodpieci.lv sātyslopā, aktivizejūt papyldu funkceju – zīduojums pret koncerta apmekliejumu (leidzeigai kai zīduojums pret dzīsmi). Vītu skaits īrūbežuots. Koncertu vadeis „Dod pieci!” ilggadiejais dīdžejs Magnuss Eriņš i skrīnūšais dīdžejs Tuoms Grēviņš. “Dod pieci!” labdareibys koncertu varēs vērtīs LTV1 tīšraidē, kai ari klauseitīs Latvejis Radejis 5 – Pieci.lv i Latvejis Radejis 1 eterā, vērtīs sabīdryskūs medeju portalā LSM.lv, kai ari Pieci.lv Facebook i Youtube kanalu tīšraidēs.

Zīduošonys vareibys labdareibys maratonam „Dod pieci!”:

• Jau nu 1. decembra sevkurs var zīduot leidzekļus apmaiņā pret meiluokuos dzīsmis atskaņuošonu Latvejis Radejis 5 – Pieci.lv eterā. “Dod pieci!” labdareibys maratona laikā nu 16. leidz 22. decembram radejā skanēs tik par zīdojumim izvālātys dzīsmis. Zīduojumus, suocūt nu 5 eiro, var veikt sātyslopā www.dodpieci.lv.
• Itūgod pyrmū reizi “Dod pieci!” viesturē nūtiks ari eipašs labdareibys koncerts 17. decembrī nu 21.10 stuņžu leidz 23.00 Latgolys viestnīceibā GORS. Pasuokums apmaklātuojim ir daīmams par zīduojumu vysmoz 5 eiro apmārā dodpieci.lv sātyslopā, aktivizejūt papyldu funkceju – zīduojums pret koncerta apmekliejumu (leidzeigai kai zīduojums pret dzīsmi).
• Nu 1. decembra skaidrys i bezskaidrys naudys zīduojumi tiks pījimti ari „Circle K” dagvīlys uzpiļdis stacejuos vysā Latvejā. Itūgod „Circle K” apsūlejs dubultuot tūs zīduojumus, kas sajimti jūs dagvīlys uzpiļdis stacejuos.
• Nu 16. leidz 22. decembram skaidrys i bezskaidrys naudys zīduojumus byus īspiejams veikt ari labdareibys maratona stykla studejā Vacreigā, Dūma laukumā.