Tievanānu pavasarī nanūskaiteitī dzejūli, kas beja mobiluo telepona pīzeimu gruomateņā. Pa ceļam sabīdriskajā transportā i iz īlys, kod papeirs ir pildspolva par daudz tuoli, a laiks īt par daudz mudri.

***
svīksta rūzis iz calma
bejušuos jubilejuos
i nav vairs nivīna
kam pasaceit paļdis
a es eju pa dabasim
eju pa zemi

muna bierneiba gryusna
i dzemdej pa kačalānam
poša nu seve
kasgods pa Juonim

jī sasaroksta
jī sasazvona
vysi rodi ir facebook čatā
jī gaida laimeiguos viests

***
ka kotram bomžam
bez dzedu i pradzedu sātys
kū satiksi viļcīnī Zylupe-Reiga
īdūsi laimis monetu
tev golā byus tyukstūša caurumu zečē
ci nikod vaira nasatīkamūs ļaužu
zvaigznuojā soltā
kai tvitera sekuotuoju symti
kas vaicoj piec laimis
i kircinej cereņu zorā

ceri voi naceri
tova laime ir frekveņcē cytā
jei braukoj ar mersedesu
i kotru pavasar aprelī soltā
sastota buļbys
vacainē tuklā

***
ceri voi naceri –
sacerēs dzejūli
cereni tovā vītā
i sakriss iudiņa paļtī
kai boltā i liļovā dečī

a tu ceri voi naceri –
itūgod dabasi sasakuļs
gaišā i čouksteigā mannā
i pīns nu pīneju
itūgod lizeikā
garšuos kai tikkū slaukts

i tu ceri voi naceri –
itūgod dabasūs
vysys bierneibys gūvs:
Raibale, Zīdale, Vabale, Bryune
myudēs kai cereņu laikā pārkiuņs
i nūlyzguos plykūs ceļgolus
osom i meikstom mēlem
i suop, i žāl

i ceri voi naceri –
byus tai, kai byus

***
leits nūlyzgoj zemi kai teļš
i dasalīk zeist ar slapņu i zemainu mēli
ar glupu i meikstu purnu
maņ pruotu
kai cici boksta
i jauc vysu kalenderi i planus uorā

varaveiksne izamat leika
i osa kai teļa mugora
i zeme sabūž spolvu
zaļu kai zuole

i ceri voi nā –
pavasarī vyss ir dzeivs
i kotrā kūka stymbynā
cereiba ūlys perej