Rokstu sagataveja: portals lakuga.lv

Gids Laurs Magazeiņs nu “Ceļo ar Lauri” aicynoj iz latgalisku pastaigu Rēzeknē “Nu Trasuna pi Rancāna” 5. martā, nuokušajā dīnā piec Latgalīšu kulturys goda bolvys “Boņuks 2022” padūšonys. Pusūtrys stuņdis laikā plānuots nūīt ap 4 km.

Pastaigys suokums svātdiņ, 5.martā, 14 stuņdēs paradzāts pi Rēzeknis Muzykys vydsškolys Atbreivuošonys alejā 56, kur atsarūn ari Fraņča Trasuna pīmineklis. “Tuoļuok myusu ceļš vess pi Latgolys kongresa symtgadei veļteituo pīminekļa, piečuok Latgolys īla ar dastuošonu pi Vladislava Luoča Latgalīšu rakstnīceibys muzeja ākys Kruoslovys īlā. Kai jau klasiski svātdīnei, cauri tiergam īsim iz bazneicu. Pi Rēzeknis Jezus Sirds katedralis apsavērsim veiskupam Julianam Vaivodam veļteitū pīminekli i atsaguoduosim par Latgolai svareigim cylvākim, kas ir bejuši saisteiti ar itū bazneicu i draudzi. Vāluok škārsuosim Rēzeknis upi i tiksim lobajā krostā, tam sekuos kuopīņs školys kolnā pi Rēzeknis Vaļsts 1. gimnazejis i Rēzeknis Muokslys vydsškolys. Piec tam myus sagaida nūstuošona pi Latgolys Muorys i Valerejis Seilis sātys, pastaigu nūslādzūt pi Nikodemam Rancanam veļteituo pīminekļa pi Rēzeknis Tehnologeju akademejis golvonuos ākys,” maršrutu raksturoj Laurs Magazeiņs. Latgaliskuo pastaiga ir plānuota kai eisa ekskurseja pa latgaliskajom vītom Rēzeknē, kas piļsātā līcynoj par aktivūs latgalīšu īguļdejumu. Tuos finišs paradzāts ap 15.30 stuņdem pi Rēzeknis Tehnologeju akademejis golvonuos ākys Atbreivuošonys alejā 115.

Daleibys moksys pastaigai naasūt, tok, kai soka Laurs, “čajam drūsi var izsvīst” aba par zīduojumim. Dasasaceišona ekskursejai: Rēzeknis Turisma informacejis centrā, tel. 26332249, e-posts: tic@rezekne.lv