Rokstu sagataveja: portals lakuga.lv

Leldīnē Rēzeknis nūvoda Drycānu Romys katuoļu bazneicā īsaskanēja jaunys digitaluos varganis “Johannus Opus 255 light”. Niu ari iz prīšku Drycānu bazneicā paradzāts atteisteit sakraluo i laiceiguo satura kulturys nūtikšonys.

Drycānu katuoļu bazneicā jaunuos varganis tykušys, pasasokūt bīdreibys “Maziča” projektam. Bīdreibu puorstuov Juoņs i Ineta Veličko, tei ir saime, kura aptyvai pyrma septeņu godu puorsacāluse nu Reigys iz Rēzeknis nūvoda Drycānu pogostu, jo saprotuši, ka Reiga vystik palykuse par lelu. Kai Juoņa, tai i Inetys saknis vaicuojamys tepat Latgolā – Daugovpilī i Aglyunā. Tok Drycānus izavieliejuši partū, ka te jau dzeivuojuse Juoņa muosa i ari pošim bejuse vareiba atrast sātu.

Kai stuosta Ineta Veličko, Drycānu katuoļu bazneicā ari da šam bejušys varganis, tok cīši biedeigā, praktiski nalītojamā stuovūklī. “Veirs Juoņs Rēzeknis Juoņa Ivanova Muzykys vydsškolā apvuica jaunūs kora dzīduotuojus i pasnādz dirigiešonu, jis ir ari Drycānu katuoļu bazneicys varganists. Mums saimē aug meita, īspiejams, ari jai byus interese byut par varganisti.”

Ineta dasoka, ka koč ari projekta eistynuošona beja gona gryuta – daudz dokumentacejis, mainejuos vargaņu moduļs i cenys, vystik ir cīši lela prīca, ka tys ir pabeigts i niu var uzelpuot. “Leldīnē varganis tyka īskandynuotys, tok mes grybātu kab ar laiku Drycānūs byutu plašuoks kulturys nūtikšonu pīduovuojums, byutu koncerti kai ar Drycānu sīvīšu vokalū ansambli “Almus”, tai i cytim muzikim, vys par konkretim pasuocīnim vēļ drupeit par agru sprīst.”

Jaunuos varganis tyka īguoduotys, pasasokūt Rēzeknis rajona kūpīnu partnereibys reikuotajam atkluotajam projektu konkursam, kura laikā tyka realizāts projekts “Ērgeļu skaņu krāsas Dricānu Romas katoļu baznīcā”. Teik plānuots, ka projekta realizacejis rezultatā varēs aizsuokt daudzveideigu tematiskūs, kulturys i atpyutys pasuokumu pīduovuojumu vysom vacuma grupom.