21. junī Vaļsts Heraldikys komiseja izskateja Aglyunys nūvoda dūmis īsnīgtū nūvoda gierbūņa skici i atbaļsteja tuos tuoļuoku sagataveišonu atbylstūšu heraldikys nūsacejumim.

Aglyunys gierbūņs ir taiseits iz angļu tipa vairūga. Vairūga fons ir zyls, tys simbolizej Latgolai rakstureigūs iudiņus – azarus, upis i olūtus. Gierbūņa vydā sudorbra kruosys stilizāts Aglyunys bazilikys tūrņu centralais krysts, kas simbolizej nūvodu ar centru Aglyunā, kai cīši seneju svātvītu i svātceļuojumu mierki. Krysta četri spaiti simbolizej prīškdīnu ceļus i četrys Aglyunys nūvoda puorvaļdis.

Nūvoda gierbūņa izstruode izsuokta taišni pyrma diveju godu – 2010. goda 17. junī, kod Aglyunys nūvoda dūmē tyka pījimts lāmums par ideju konkursa – Aglyunys nūvoda gierbūņa skiču taiseišonu – reikuošonu. Konkursa mierkis beja sataiseit Aglyunys nūvoda gierbūni kai unikalu Aglyunys nūvoda atpazeistameibys zeimi, kas simbolizātu teritorejis dobu, kulturviesturiskuos vierteibys i tradicejis. Konkursam tyka īsnāgtys 8 ideju skicis, nu Dīvam žāļ nivīna natyka atbaļsteita tuoļuokai vierzeišonai.

Piečuok deputati izskateja i izvierteja SIA “LTD Karogi” muokslenīka pīduovuotūs gierbūņa variantus, par kurim kotrs varieja izasaceit ari nūvoda sātyslopā, nu ari itī pīduovuojumi atbolstu nagive.

Tik ituo goda marta beiguos Aglyunys nūvoda dūme beidzūt pījieme lāmumu lyugt apstiprynuot i registrēt Aglyunys nūvoda gierbūni. Nūvoda deputatu vairuokums atbaļsteja ideju par sudobra krystu iz zyla fona, kū atbaļsteja ari Heraldikys komisejā, kuruos specialisti itū ideju nūviertieja kai interesnu, gona svineigu i ari atbiļsteigu Aglyunys nūvodam, kas teik atpazeist kai svietceļuojumu golapunkts kotra goda 15. augustā.

Kab niu varātu pījimt oficialu lāmumu par Aglyunys nūvoda gierbūni, prīškā vēļ tehniskais dorbs pi gierbūņa sagataveišonys i apstiprynuošonys – tuo precizs aproksts, izskota nūformiešona atbylstūši lykumam i vysim vajadzeigajim heraldikys nūsacejumim.

Informaceju sagatvieja Zane Ločmele, Aglyunys nūvoda dūme