Rokstu sagataveja: portals lakuga.lv

Catūrtdiņ, 5. decembrī, Daugovpilī i tīšraidē škārsteiklā nūtyka literaruo konkursa “Latgolys prozys skaitejumi 2024” nūslāguma pasuokums, kas beja vīns nu literaturys festivala “Prozas lasījumi” nūtikšonu. Ituo gods konkursā tyka izziņuotys septenis finalistis, bet iz vysa leluokū žurejis punktu skaitu sajēme i par lobuokū pīzeits literatis, žurnalistis Ingys Kaļvys-Mininys garstuosta “Sirdsbolss” fragments.

Latgalīšu kulturys kusteiba “Volūda”, sasadorbojūt ar festivalu “Prozas lasījumi”, pīktū reizi izsludynuoja konkursu “Latgolys prozys skaitejumi”, kura mierkis ir veicynuot literarū procesu Latgolā i jaunu, Latgolys kulturtelpai pīdareigu dorbu tapšonu. Itūgod par uzvarātuoju 19 raksteituoja konkureņcē par lobuokū dorbu tyka pīzeits literatis, žurnalistis i gruomotu blogeris Ingys Kaļvys-Mininys (Kaļva-Miņina) garstuosta bārnim “Sirdsbolss” fragments. Ūtrū vītu sajēme Laurys Strodis dorbs “Saule nūrīt sorkona”, bet trešajā vītā – Annele Slišāne ar “Uorā”. Taipat konkursa žurejis atzineibys sajēme Lilijis Limanis, Ingys Mastinis, Vitys Briškys i Sarmītis Trūpys literarī dorbi. Konkursa nūslāgumā, kas nūtyka Daugovpiļs Vīneibys noma kopejneicā, varēja dzierdēt sešus nu septeņu finalistu dorbu, nūtikšonu vadeja aktrise Kristīne Veinšteina, bet skaneigi papyldynuoja muzike Amanda Lapa.

Inga Kaļva-Minina ir žurnaliste, literate i gruomotu blogere, kurai pateik stuosteit par cytu rodūšū dorbu, bet sovu reizi pīroksta koč kū i poša – dzeju voi prozys gobolus. Par konkursu i juo rezultatu Inga soka: “Konkursā “Latgolys prozys skaitejumi” pīsadaleju ūtrū reizi i prīcojūs, ka taišni konkursa jubilejis jeb pīktuos nūtikšonys reizē palyku par uzvarātuoju. Dzeju raksteit saīt bīžuok, bet prozys raksteišona aizjam vaira laika – kab padūmuotu, vizualizātu ocu prīškā, saprostu sižeta vierzeibu. Eistineibā jau seņ gribieju pīraksteit latgaliski kaidu prozys dorbu bārnim, kurā byutu i pīdzeivuojumu dzierksts, i fantazejis elementi, tod niu konkurss beja loba vareiba sovu ideju eistynuot. Konkursam beju īsyutejuse dorba fragmentu i cīši nūvierteju žurejis īsacejumus, kas nūderēs, rokstūt turpynuojumu itam garstuostam.” Ingys Kaļvys-Mininys “Sirdsbolss” izskanēja kai Daugovpilī, konkursa “Latgolys prozys skaitejumi 2024” nūslāgumā, tai i Reigā – festivala “Prozas lasījumi” nūslāguma nūtikšonā.  “Sirdsbolss” izskanēja gon Daugavpilī “Latgolys prozys skaitejumu” nūslāguma pasuokumā, kas, kai soka poša Inga, dūd īdviesmi rodūši dareit i iz prīšku.  

Konkursā “Latgolys prozys skaitejumi 2024” beja aicynuoti pīsadaleit vysa vacuma Latgolys kulturtelpai pīdareigi autori, kuri roksta prozu. Konkursā tyka sajimti 19 vysaidu autoru dorbi kai latvīšu literarajā, tai latgalīšu rokstu volūdā. Konkursam dorbus īsyuteja kai Latgolys kulturtelpā jau zynomi autori, tai i debitanti. Īsyuteitūs dorbus vērtēja žureja, kurys sastuovā beja literaturzynuotnīks, literats Valentins Lukaševičs, literate i literaturzynuotneica Ilze Sperga, žurnaliste Maruta Latkovska, literate i literaturzynuotneica Elīna Kokareviča, kai ari gruomotu blogere Inga Gedžūne. Konkursa žureja, viertejūt Ingys Kaļvys-Mininys dorbu “Sirdsbolss”, komentej: “Cīši sirsneigs fantazejis žanra stuosts, kurā superspieja ir na liduošona voi dzeļža kulaks, bet latgalīšu volūdys prasšona. Teksts pīraksteits cīši profesionali, ir daudzi sūlejūšs – fantazejis žanrys latgaliski bārnim nav kas taids, ar kū daītu bīži sasatikt. Labi vadeits stuostejums, kas bez lelu puorsteigumu vad pa īstaiguotim pādim magiskajā realitatē. Dinamiski, originali. Takūša volūda, sižetiski. Kai fragments nu leluoka gobola cīši lobs.” Dorba “Sirdsbolss” fragmentu var puorskaiteit i nūsaklauseit ITE.

Konkursu “Latgolys prozys skaitejumi 2024” kai vīnu nu literaruos jaunradis latgaliski radeišonys programys nūtikšonu 2024. godā organizēja latgalīšu kulturys kusteiba “Volūda” (bīdreiba “LgSC), tū atbaļsteja literaturys festivals “Prozas lasījumi 2024” (Latvejis Rakstnīku savīneiba), Vaļsts kulturkapitala fonds, latgalīšu kulturys ziņu portals lakuga.lv i žurnals “Domuzīme”.

Fotogalerejā: konkursa “Latgolys prozys skaitejumi 2024” nūslāguma nūtikšona, foto Amanda Anusāne/portals lakuga.lv