Rokstu sagataveja: portals lakuga.lv

24. janvarī 17.00 stuņdēs Rēzeknis nūvoda Kaunatys pogosta tautys nomā sevkurs interesents byus gaideits iz latgalīšu puosoku vokoru “Laimi meklejūt”, kur kūpā ar Rēzeknis Tehnologeju akademejis (RTA) asociātū profesori Angeliku Juško-Štekeli tiks maklātys atbiļdis iz vaicuojumu, kai latgalīšu tautys puosokuos ir attāluota laime, viestej Kaunatys tautys noma vadeituojis Aijis Kuzminskys sagataveituo informaceja.

Rēzeknis nūvoda Kaunatys tautys nomā kūpā ar Rēzeknis Tehnologeju akademejis asociātū profesori, filologejis zynuotņu doktori i vodūšū pietneicu latvīšu folkloristikā Angeliku Juško-Štekeli byus vareiba meklēt, stuosteit i izzynuot, kai latgalīšu tautys puosokuos ir attāluota laime, kai atrast laimi i tū pīradynuot. Laimi i tuos puosoku tālus paleidzēs izbūrt Kaunatys vydsškolys folklorys kūpys “Rāznaviņa” (vad. Santa Viša-Gaisiņa) dalinīki.

Kaunatys tautys noma vadeituoja Aija Kuzminska stuosta, ka koč i Kaunatys pogosts ir gona latgaliskys, vysubīžuok latgalīšu volūda teik izmontuota tik saziņai sovā vydā, na publiskūs pasuocīņūs. Aijai jau kaidu šaļti asūt bejuse ideja organizēt pasuokumu taišni par latgalīšu puosokom, i jei izsoka pateiceibu RTA profesorei Angelikai Juško-Štekelei, kura pīkrytuse daleitīs sovuos zynuošonuos, kam taišni folklora, tymā vydā ari puosokys, ir bejušys Angelikys pietejumu temu vydā.

“Maņ redzīs, ka cīši daudzim nu myusu ir pošim sovys puosokys, munejū par vuovereiti maņ nazkod stuosteja krystamuote, es sovpus piečuok stuosteju sovim bārnim. Tei maņ taida mozuo prīca, ka pasuokumā saīs bārnim paruodeit i izceļt, ka latgalīšu volūda var tikt izmontuota ari uorpus sātys,” stuosta Aija Kuzminska.