Kai īprīšk stuosteits, 5.febralī bīdreibys dybynuotuoji saguo iz kūpeigu saīsmi.  Piec diveju mienešu nu Uzjāmumu Registra (UR) sajimta registracejis aplīceiba. Leluokais ībyldums nu UR puses beja par latgalīšu volūdu – atseviški īsnīgtī dokumenti beja tymā sastuodeiti – aizbyldynuojumi beja formali, ka dokumentim juobyut sagotovuotim „literarā volūdā”. Pretargumenti, ka ari latgalīšu rokstu volūda ir literara, natyka jimti vārā. Juoatzeist gūdeigai, jau suokumā tyka dūmuots, ka UR pamatuojums byus nūpītnuoks, pīvadumam, bolstūt tū iz zynomū 2009.goda Augstuokuos Tīsys lāmumu. http://www.ur.gov.lv/?a=65&l=761&v=lv

Kod vysleidz latgalisks dokuments natyka pījimts, itū reiz natyka īts puorsyudziešonys ceļš, kas jau tyka dareits pīmynātajā 2009.goda gadīnī, bet tyka īsnīgts attīceigūs dokumentu tulkuojums (ar vaļdes prīšksādātuoja aplīcynuojumu, ka tulkuojums pareizs). Gols golā UR pīkryta itaidam rysynuojumam, deļ tam bīdreiba „Latgolys Saeima” kliust par  juridiskū personu Latvejī, kas pīregistrāta iz dokumentu pamata, kuru vydā ir vīns, originalā sastuodeits latgalīšu volūdā, ar davīnuotu attīceigu tulkuojumu latvīšu literarajā volūdā.

Itais fakts ir vēļ vīns pīruodejums, ka Latvejā latgalīšu volūda niu nateik skaiteita par pylnvierteigu latvīšu (vaļsts) volūdys dali i atsevišķūs gadīņūs teik pīleidzynuota svešvolūdai.

Kotrā gadīnī niule ir sajimta bīdreibys „Latgolys Saeima” oficialays registracejis aplīceiba datieta ar 2011.goda 1.apreli. Ar itū nūtykumu i simboliskū datumu tod ari varam apsveikt vysus bīdreibys dybynuotuojus.

Bīdreiba “Latgolys Saeima” ir sovys darbeibys suokumā, bet ir pagiuts pīsadaleit sasatikšonā ar Latvejis Republikys Saeimā izveiduotuos Latgolys atbolsta grupys deputatim. Vairuok informacejis: https://www.lakuga.lv/posts/voi-latgalits-ir-latvisa-paveids/

Marta suokumā bīdreiba “Latgolys Saeima” aicynova ļauds aktivai izmontuot īspieji aizpiļdeit tautys skaiteišonys anketu elektroniski. https://www.lakuga.lv/posts/pyrmu-reizi-saskaita-ari-latgalisus/

Bīdreibys vaļde jau divejis reizis kūpā saguojuse dorbam i nuokamuo vaļdes sēde tiks sasaukta 15.aprelī septeņuos stuņdēs vokorā Reigā. Ka interesentim ir gribiešona tymā pīsadaleit, tod lyudzams sasazynuot pa e-postu: latgolyssaeima@gmail.com voi iz teleponu: 26393531

Apreļa beiguos paradzāts sareikuot sasatikšonu ari Rēzeknē – par tū seikuoka informaceja byus tyvuokajā laikā.

Teik duomuots ari par bīdreibys „Latgolys Saeima” darbeibys aktiviziešonu kasdīnā – pyrmuo īspieja tū dareit ir caur škārsteikla lopu saeima.latgola.lv – tymā ir davīnuoti ari bīdreibys statuti i jaunu bīdru pīsasaceišonys anketa (sadaļā “Par bīdreibu”) i cyta informaceja.

Kotrs interesents var pīzasaceit īspiejai pylnvierteigai īzasaisteit kūpeigajā dorbā, deļ tuo ir vajadzeigs īsaregistrēt – lopys augšejā lobajā styurī atrūnam pūga: Sataisēt jaunu kontu

Ka ir kaidi vaicuojumi saisteibā ar bīdreibu vysod drūsai rokst iz latgolyssaeima@gmail.com

Bīdreibys “Latgolys Saeima”

vaļdes vadeituojs Jurs Viļums