Lai saguoduotu īspieju Latgolys ceņteigajim i tryuceigajim jauneklim tikt pi augstškolys izgleiteibys, b-ba „Latgalīšu studentu fonds”, kas jau 8 godus vuoc i kruoj leidzekļus šam nūlyukam, 1937.-38. m.g. ir paredziejuse 12 stipendejis pa Ls 300 godā izcyluokūs Latgolys sabīdryskūs darbinīku pīmiņai. Pyrmuos šaida veida stipendejis ir nūdybynuotys myrušuo b-bys pyrmuo gūda bīdra, Tautys lobkl. ministra Vl. Rubuļa i leluo Latgolys sabīdryskuo darbinīka mons. Nikodema Rancāna pīmiņai.

Ari bruoļu Skryndu pīmiņai b-ba „Latgalīšu studentu fonds” ir paredziejuse nūdybynuot dažys stipendejis, bet pošreiz leidzekļu tryukums naļaun šū lobū nūdūmu izvest dzeivē.

Sabīdryskū dorbinīku pīmiņai veļteituos stipendejis leidzeigi cytom b-bys „Latg. stud. fonds” stipendijom byus atmoksojamys, i tuos tiks pīškiertys tim vacuokūs kursu studentim, kuri byus izruodejuši lobuokys sekmus studejuos.

Bez šuom stipendejom b-ba „Latg. stud. fonds” 1937.-38. m. g. ir paredziejuse dažys atmoksojamys stipendejis ari jaunuokūs kursu centeiguokajim studentim.

Personom, kurys grybātu kliut par b-bys „Latgalīšu studentu fonds” stipendistim, suocūt ar 1937. g. 15. septembri ir juoīsnādz iz specialys veidlopys saraksteits īsnāgums b-bys „Latgalīšu studentu fonds” vaļdei, Reigā, Valdemara īlā 36-a. Pi īsnāguma obligatoriski juopīvīnoj izroksts nu lekceju gruomatenis par sekmem studejuos i aplīceiba par montys stuovūkli.

Olūts: Jaunais Vōrds. – Reiga, 1937. g. 12. augustā. – Nr. 30. – 1. pl.