Rokstu sagataveja: portals lakuga.lv

26. julī 19 stuņdēs Bolvu nūvoda Medņovā, puļcejūt kūpā tautys muzykantus i garmaņu spālātuojus, nūtiks jau deveņpadsmytais tautys muzykantu festivals “Ermoņiku skaņas”. Muzykantu i kapelu vydā byus gosti kai nu tyvuokuos apleicīnis – Medņovys, Viļakys, Saļņovys i c., tai nu puornūvodu – Rankys, Cāsu i Reigys. Eipašī gosti – TDK “Oglīte” nu Reigys.

Muzykantu saīts “Ermoņiku skaņas” Medņovā aizasuoce 2006. gods 29. aprelī. Pasuokuma idejis autori i realizātuoji beja Medņovys tautys noma vadeituoja Skaidreite Šaicāne (skaiti plotuoku interveju ar Skaidreiti) i muzykants, garmanists Jezups Zaremba. Par saīta aizsuokumim i deļkuo taišni garmanis izalaseitys par pasuokuma golvonū instrumentu Skaidreite stuosta: “Maņ muojuos bīži itys instruments tyka spieļuots gondreiž kotrūs svātkūs – izlaidumūs, pylngadeibuos i cytuos nūtikšonuos. Muns vacins i mamys vysi treis bruoli i muosys beja muzykanti – spieļova garmoškys, ceiterkūklis, bajanu i šmuki dzīdova. Vairuoki meldeni ir guojuši taišni nu muna vacina – Erciku giminis, deļtuo taišni ermonikys, jo daudzi laukūs itū instrumentu spieļova i spieļoj.”

Itymā godā festivalā pīsadaleis muzykanti – Alfrēds Circens, Māris i Mārtiņš Briediņi nu Medņovys, Ontons Savickis nu Kaunatys, Dainis Ločmelis nu Saļņovys, Kristiāns Šaicāns i Vitālijs Logins nu Viļakys, Elīza Pužule nu Žeiguru, Iveta i Maija Arenys nu Rankys, Jezups Zaremba kūpā ar Vinsentu Kūkuoju. Ar muzykalim prīšknasumim prīcynuos ari kapelys – Baļtinovys kapela, Kuociņu (Kociņu) kapela nu Cāsu, Medņovys kapelys “Egle” i “Paeglīte”, “Atzele” nu Viļakys, Malnovys kapela, Brīžucīma damu kapela “AMMA”, Ivetys Dukaļskys kapela “Svērte” nu Reigys i Upītis jaunīšu kapela. Doncuos tautys deju kolektivs “Oglīte” nu Reigys, kuri pasuokumā pīsadola jau nu 2021. gods. Kolektiva vadeituojam Juoņam Marcinkevičam taišni Medņova bejuse pyrmuo dorba vīta, i ite jis vadejs sovu pyrmū deju kolektivu.

Skaidreite stuosta, ka muzykanti gaida i poši pīsasoka pasuokumam. Koč i leluokais akcents teik lykts taišni iz garmaņu muzykantim, ir ari taidi, kas spieļoj akordeonus. “Medņavīšim i puorejim pateik jestrys melodejis i muzykanti ar humora izjiutu. Mes poši izalosom, kas uzastuos, dīvamžāļ vysus mes navarim pajimt – tūlaik pasuokums byutu juoreikoj iz div dīnu.” Jei ir prīceiga, ka daudzi jaunī muzykanti ir izavuicejuši spieļuot garmanis, i radz, ka itam pasuokumam byus nuokūtne.

Pasuokuma laikā bārnim byus pīpyušamuos atrakcejis, sevkuram byus vareiba izbraukt zyrga aizjiugā voi ar retro automobili. Festivalu itūgod vadeis Arnis Bukšs nu Škilbānu pogosta. Pasuokumu pabolsta Vaļsts kulturkapitala fonds.